Baılanys ortalyǵy «bir tereze» qaǵıdasy boıynsha qyzmet kórsete otyryp, oralman mártebesin jáne Qazaqstan azamattyǵyn alý, áleýmettik jeńildik pen tólemaqylardy, memlekettik kómekti belgileý máseleleri boıynsha sondaı-aq oralmandar men ımmıgranttardy jumysqa ornalastyrý úshin olarǵa óńirlik kvota belgileýge qatysty keńester beredi. Bıznes ashý jáne tehnologııalardy damytý boıynsha keńes alý úshin qala jáne oblys ákimdikterimen, ulttyq kompanııalarmen, «Atameken» Ulttyq kásipkerler palatasymen, «Damý» kásipkerlikti damytý qorymen, «Zerde» jáne «QazAgro» holdıngterimen seriktestik qarym-qatynastar ornatylyp jatyr. Sonymen birge qazaqstandyq uıaly operatorlar nómirlerinen tegin qońyraý shalý múmkindigi qarastyrylǵan.
Baılanys ortalyǵyna 1404 (mobıldi qońyraý shalý), +7 (7172) 981404 (shetelden qońyraý soǵatyndarǵa), 8-800-080-1404 (Qazaqstandaǵy qalalyq telefonnan) nómirleri boıynsha habarlasýǵa bolady. Sondaı-aq ortalyq qyzmetkerlerimen WhatsApp, Telegram jáne Skype messendjerleri arqyly baılanysqa shyǵýǵa bolady.
«Tuńǵysh Prezıdent – Elbasy Nursultan Nazarbaevtyń bastamasymen qurylǵan «Otandastar qory» tarıhı otandaryna oralǵan, sondaı-aq shetelde turyp jatqan otandastaryna kómek pen qoldaý kórsetý maqsatynda birneshe jobany júzege asyryp jatyr. Qordyń negizgi mindetteriniń biri Qazaqstanǵa oralyp jatqan otandastarǵa jyldam beıimdelýge kómektesý. Biryńǵaı baılanys ortalyǵynyń ashylýy barlyq qajetti kómekti jınap qana qoımaı, oralmandar men shetelde turyp jatqan otandastarymyzdyń problemalaryn sheshý úshin memlekettik baǵdarlamalardy júzege asyryp, qoldaý kórsetýge qajetti aqparattyń derekkózi bolmaq. Mundaı qyzmet túriniń paıda bolýy memlekettiń otandastardyń problemasyna degen nazarynyń deńgeıin kórsetedi», deıdi N.Ábiqaev.
Resmı málimetterge súıensek, 1991-2016 jyldar aralyǵynda Qazaqstanǵa 1 mıllıonnan asa qandastarymyz kóship kelgen. Igilikti bastamaǵa qol qoıý kezinde taraptar keleshekte birlesken sharalar ótkizý isin talqylady. Q.Esekeev jobanyń áleýmettik mańyzy zor ekenin ári ózara yntymaqtastyqqa negizdelgen barynsha qolaıly sharttardy júzege asyrýǵa yntaly ekendikterin jetkizdi. Atalǵan jobanyń atqarylý merzimi 2022 jylǵa deıin dep belgilendi.
