Ekinshi ret uıymdastyrylǵan bıznes-ıdeıalar saıysyna 190-nan asa jobadan ótinish kelip tústi, onyń 170-i jarysqa qatysty. Jastardy kásipkerlikke baýlyp, tyń ıdeıalardy izdegen saıys bıyl «IT», «Ǵylym jáne tehnologııa», «Áleýmettik jobalar», «Týrızm», «Agrobıznes» baǵyttary boıynsha úzdik startaptar anyqtalyp, 25 –i aqtyq kezeńge ótti. Olar sáýirdiń 27-si kúni jarystyń aqtyq kezeńinde kásipkerlerden quralǵan qazylar alqasynda qorǵap, júldeli 1 mıllıon 750 myń teńge úshin talasatyn bolady.
- О́tken jyly 127 joba júldeli úsh oryn úshin talasqan bolatyn. Biraq, ol kezde baǵyttardyń ártúrliligine baılanysty qazylar alqasyna úzdik jobalardy anyqtaý qıyn bolǵan edi. Sondyqtan bıyl bes baǵytqa bólýdi durys sanadyq, deıdi zııatkerlik mekteptiń dırektory Ermek Paızov.
Qatysýshylar «Áleýmettik jobalar» nomınasııasynda belsendilik kórsetti. 53 jobanyń ishinen bes joba ǵana iriktelip alyndy. Al «Agrobıznes» nomınasııasyna 40, «Týrızmge» - 35, «Ǵylym jáne tehnologııaǵa» 45 ótinish keldi. Al «IT» nomınasııasyna 21 joba qatysty.
Baıqaý úsh kezeńnen turady. Qatysýshy eń aldymen jobanyń mańyzdylyǵy, suranysy, tıimdiligi týraly prezentasııa daıyndap, www.caspianstartup.kz saıtyna tirkelýi mindetteldi. Al ekinshi kezeńde baıqaýdyń qazylar alqasy kelgen jobalardyń ishinen eń úzdik 25 jobany tańdap, aqtyq kezeńge joldandy. Irikteýden ótken qatysýshylar bıznes-jobalaryn kásipkerler men qazylar alqasynyń aldynda qorǵaıdy. Ár nomınasııanyń jeńimpazyna 350 myń teńge beriledi.
- «Caspian Startup-2019» - tamasha joba. Qazirgi tańda startap –bıznestiń jetekshi baǵyttarynyń biri. Bul jastardyń ózin-ózi kórsetip, joba usynýyna taptyrmas múmkindik. Sharaǵa qatysqan ár kásipker balalarǵa keńes berip, birneshe jyldyq tájirıbesimen bólisip qana qoımaı, jobalaryn júzege asyrýǵa atsalysa alady. Sol sebepti mundaı jarysqa bıznesmenderdiń kóptep qatysýy mańyzdy, deıdi qazylar alqasynyń múshesi, «Prestige» jıhaz salonynyń negizin qalaýshy Irına Belıaeva.
Startap jobalar baıqaýyna «MKS Logistics» JShS, «Mediana» IT-kompanııasy, «EXPO&WOMEN», «Evrovoıaj» týr agenttigi, «TETIS» JShS demeýshilik etýge nıet bildirdi. Al Mańǵystaý oblystyq bilim basqarmasy, «Mangystau» telearnasy, «Atameken» kásipkerler palatasynyń, Mańǵystaý oblystyq fılıaly baıqaý seriktesteri atandy.
Sonymen qatar, jarys qatysýshylarynyń kásipkerlikke yntasyn arttyra túsý maqsatynda oblystyń beldi bıznes-trenerleri men kásipkerleri arnaıy sheberlik saǵattaryn ótkizdi.
