Jolyńyz túsip, Atyraýǵa bara qalsańyz, Halel Dosmuhamedov atyndaǵy memlekettik ýnıversıtettiń aldynan osy tulǵalardyń tas músinderin kóre alasyz. Bilim ordasynyń aldynan oryn alǵan Halel eskertkishiniń eki jaǵy qazaq eliniń tarıhynda esimderi qurmetpen atalatyn kórnekti tulǵalardyń bıýst beınelerimen tolyqty. «Tulǵalar alleıasynyń» ashylý saltanatyna músinderi qoıylǵan qaıratkerlerdiń urpaqtary arnaıy kelip qatysty.
– Ultymyzdyń tarıhy men rýhanııatyna ólsheýsiz eńbek sińirgen tulǵalardy jastar bilip júrse eken, solardyń ómir joldarynan taǵylym alyp, eline, jerine qyzmet etse eken degen nıetpen osyndaı bastama kótergen edik. Eldigimiz úshin qyzmet etken ardaqty tulǵalarymyzdyń músinderi bilim ordasynyń kórnekti jerinen oryn alǵany – biz úshin úlken abyroı, maqtanysh, – deıdi ýnıversıtet rektory, hımııa ǵylymdarynyń doktory Abzal Taltenov.
«Tulǵalar alleıasynyń» ashylý saltanatynda Qazaqstannyń Reseıdegi Tótenshe jáne ókiletti elshisi Imanǵalı Tasmaǵambetovtiń quttyqtaý haty oqyldy.
– Bir alańdaǵy segiz arystyń segiz myńnan astam jas bilim alatyn qarashańyraqtyń kireberisinde turǵanynyń ózi rýh beredi. Jigerińdi janıdy. Ulylardyń janyna aıaldamaı ótýge dátiń barmaıtyndaı áserli músinder, ásirese eskerýsiz qalyp júrgen arystarymyzdyń tuǵyrǵa qonǵanyna rıza peıildemiz, – dep atap ótti qoǵam qaıratkeri Rashılıa Múrsálıeva.
Alleıanyń ashylý sátine aımaqtaǵy zııaly qaýym ókilderi, jastar men qoǵamdyq uıym músheleri kýá boldy. Rýhanı jańǵyrýdyń sózben emes, osylaısha ispen kórsetilýi de kóńilge qýanysh syılaıdy.
ATYRAÝ
