Halqymyzdyń basyna qara bult úıirilgen qıly kezeńderde jerdiń shetinen, jeldiń ótinen tabylyp, qoı ústine boztorǵaı jumyrtqalaǵan beıbit ómir kezinde el-jurtyna aqylshy, pana, qamqor bola bilgen. Abylaı Baltabaev aqsaqaldyń jazýyna qaraǵanda, shyn aty Qazbek eken. Bir orynda baıyz taýyp otyra almaǵandyqtan jeńgeleri erkeletip «tyshqan» atap ketken. Orta boıly, qaratory, shymyr deneli, óte shapshań kisi bolǵan. Kóziniń ótkirligi sonshalyq, adamdar týra qaraýdan ımengen. Onyń erjúrektiligi, parasattylyǵy, aqyldylyǵy balasy Qoılybaıǵa juqqan desedi. Al nemeresi Syzdyq qajy óz qarajatyna qos munaraly meshit saldyryp, medrese ashqyzǵan. Moldalardy Reseıdiń Oral óńirinen, Qostanaı jaǵynan aldyrtyp, balalardy din jolyna baýlyǵan.
Tyshqan batyrdyń jaýǵa qarsy paıdalanǵan bes qarýy bertinge deıin saqtalǵanymen, keıin ustaǵannyń qolynda, tistegenniń aýzynda ketse kerek. «Abylaı han rezıdensııasy» murajaı kesheninde naızasynyń ushy ǵana saqtaýly tur. Ony osydan eki jyl buryn urpaqtary syıǵa tartypty. Naızanyń basy – 24,3 santımetr, dıametri 3 santımetr. Jaqyn qashyqtyqta dushpanmen betpe-bet kelgende qoldanylǵanǵa uqsaıdy. Murajaı ekspozısııasynyń «Taq» zalyna qoıylǵan jádigerdi 30 myńnan astam adam tamashalapty. Shetelden kelgen meımandarǵa da onyń tarıhy, batyr jaıly maǵlumattar keńinen usynylady.
Sýyq qarýǵa QR kody qoıylyp, qazirgi zaman talabyna sáıkes sıfrlandyrylǵan.
Soltústik Qazaqstan oblysy
