Skandınavııalyq júris – dene pishinin, hal-ahýaldy jáne kóńil kúıdi jaqsartý, sonymen qatar salmaqty baqylaýdyń qarapaıym, qoljetimdi jáne óte tıimdi tásili. Qazaqstandyqtar arasynda skandınavııalyq júristiń tanymaldylyǵy jyl saıyn ósip keledi. Jarysqa barlyq jastaǵy belsendi azamattar qatysa alady.
Aıtýly festıval 2019 jylǵy 2 maýsymda, Almaty qalasyndaǵy «Atakent» kórme kesheni alańynda ótedi dep kútilýde. Elimizde ótkiziletin basqa sporttyq is-sharalarǵa qaraǵanda, skandınavııalyq júris boıynsha festıvalde sporttyq qashyqtyqtyń árbir qatysýshysy men korporatıvtik komandalary úshin ýaqyt belgilenetin bolady, al qozǵalystyń durystyǵy men kórkemdiligin kásipqoı qazylar qadaǵalamaq. Múmkindikteri shektelgen qatysýshylar úshin jeke esep jasalǵan, olar tirkeý jarnasyn tólemeıdi. Uıymdastyrýshylar jarystarǵa korporatıvtik qatysýdyń tanymaldylyǵyna úlken úmit artyp otyr. Bul kompanııalar men uıymdarǵa jarys jolyn ózderiniń jarqyn brendti sporttyq kıiminde ótip, kompanııalary men brendteriniń ataýlaryn tanytýǵa zor múmkindik týdyrmaq. Alaıda basty maqsat aýyzbirlikti jáne korporatıvtik rýhty nyǵaıtý.
Barlyq qatysýshylarǵa maqtaý qaǵazdary men júldeler tapsyrylady, al jeńimpazdar – estelik medaldarǵa ıe bolady. Qatysýshylardy onlaın-tirkeý Festıval saıtynda belsendi júrgizilip jatyr. www.nordicwalkingfest.kz.
– Skandınavııalyq júris – rahatqa bólenip, ózińizdi jaqsy qalypta ustaýǵa múmkindik beretin, barlyq jastaǵy adamdar úshin fıtnestiń ásem túri. Biz, barlyq qatysýshylar úshin ýaqytty esepteýmen jáne tájirıbeli jáne bastaýshy «nordıkter» úshin qashyqtyqtary belgilengen alǵashqy jeke jarysty oılastyrdyq. Almaty Nordic Fest belsendi qazaqstandyqtardyń júregin jaýlap alady degen úmittemin, - deıdi Qor dırektory, Vankýverdegi Olımpıada oıyndarynyń kúmis júldegeri Elena Hrýstaleva.
Skandınavııalyq júris boıynsha Almaty Nordic Walking Fest festıvali Almaty qalasynyń 2019 jyldaǵy sporttyq oqıǵalarynyń resmı kúntizbesine engizilgen. Elena Hrýstalevanyń Olımpıadalyq qorynyń josparynda skandınavııalyq júris boıynsha festıvaldi Qazaqstan astanasy Nur-Sultan qalasynda jáne Shymkent qalasynda, sonymen qatar bolashaqta kórshiles О́zbekstan men Qyrǵyzstanda da ótkizý ıdeıasy bar.
Almaty qalasy sport basqarmasynyń basshysy Rústem Baıseıitov mundaı buqaralyq sport is-sharalarynyń ult densaýlyǵyn qalyptastyrýdaǵy mańyzy zor ekenin atap ótti.
– Almaty qalasy búkil Ortalyq Azııanyń buqaralyq sporttyq jarystaryn ótkizýdiń astanasyna aınaldy. Bul is-sharalar qala turǵyndarynyń hal-jaǵdaıyna, sol sııaqty qalanyń ekonomıkasyna pozıtıvti áser etýde. Skandınavııalyq júris úshin Almatyda barlyq jaǵdaılar bar. Shaharda belsendi demalýǵa arnalǵan marshrýttar men aımaqtardyń jelisi turaqty keńeıýde. Biz, Skandınavııalyq júris festıvaliniń keńge órken jaıatynyna senemiz, - deıdi Rústem Baıseıitov.
Is-sharany QR Ulttyq Olımpıada komıteti, sonymen qatar birqatar iri halyqaralyq kompanııalar da qoldap otyr.
– Elena Hrýstalevanyń Olımpıadalyq Qoryn biz dańqty qazaqstandyq alpınıstshi Maqsut Jumaevpen jáne frıstaıl boıynsha álem chempıony Iýlııa Galyshevamen birlesip, sportshy jastardy qoldaý, halyqaralyq jarystardyń qarsańynda qajetti jattyǵýlar men jarystyq tájirıbeni qamtamasyz etý maqsatymen, sonymen qatar halyqty belsendi ómir saltyna tartý boıynsha is-sharalardy ótkizý úshin qurdyq, – deıdi Elena Hrýstaleva.
Maksım Proshenko basqaratyn elimizdegi alǵashqy «Eýrazııa» skandınavııalyq júris mektebi jobanyń basty seriktesteriniń biri. Qatysýshylardyń qashyqtyqtan ótý ýaqytyn ólsheýge, trassalardy bólýge kásibı mamandar jumyldyrylatyn bolady. Uıymdastyrýshylar alqasy festıval qatysýshylary úshin birqatar sheberlik sabaqtary men jattyǵýlar ótkiziletinin aıtady.
ALMATY
