Otandasymyz amerıkalyq Reı Ostınmen kúsh synasady. 48 jastaǵy Klıvlend qalasy týmasynyń boıy 198 santımetr. Onyń kásipqoı rıngte baq synap júrgenine 21 jyl boldy. Sol ýaqyt aralyǵynda Reı 42 jekpe-jek ótkizip, 28 ret jeńiske jetti. 18 qarsylasyn nokaýtqa jiberdi. 9 ret utylyp, 4 báseke teń aıaqtaldy. Ár jyldary ol Sultan Ibragımov, Vladımır Klıchko, Odlaner Solıs, Bermeın Stıvern, Andjeı Golota, Endı Rýıs jáne taǵy basqa ataqty boksshylarmen saıysqa túsken. О́ziniń sońǵy kezdesýin ústimizdegi jyldyń 15 aqpanynda ótkizgen Ostın Roberto Alfonsodan aılasyn asyrdy.
Al Ivan Dychko 2017 jyldyń qyrkúıek aıynan kásipqoı rıngte baq synaýda. Sol aralyqta 7 kezdesý ótkizip, barlyǵyn nokaýtpen utty. Sońǵy jekpe-jegin jerlesimiz byltyrǵy jyldyń shilde aıynda ótkizdi. Onyń boıy qarsylasyna qaraǵanda 8 santımetrge uzyn. Bir aıta keterligi, qos boksshynyń jas aıyrmashylyǵy týra 20 jyldy quraıdy.
