Osynyń aldynda memlekettik tildi erkin meńgergendigi jóninde Qasym-Jomart Toqaevtyń birinshi bolyp lıngvıstıkalyq komıssııa emtıhanynan súrinbeı ótkenin baıandaǵanbyz. Endi "Uly dala qyrandary" Respýblıkalyq qoǵamdyq birlestigi usynǵan Qazaqstan Respýblıkasynyń Prezıdenttigine kandıdat retinde Sádibek Túgel memlekettik tildi erkin meńgergendigi jóninen lıngvıstıkalyq komıssııada emtıhan tapsyrdy.
Ol budan buryn, ıaǵnı 2019 jylǵy 22 sáýirde «Qazaqstan Respýblıkasyndaǵy saılaý týraly» Konstıtýsııalyq zańynyń 55-babyna sáıkes Ortalyq saılaý komıssııasyna, Qazaqstan Respýblıkasynyń Prezıdenttigine kandıdat retinde «Uly dala qyrandary» Respýblıkalyq qoǵamdyq birlestigi joǵary organynyń Qazaqstan Respýblıkasynyń Prezıdenttikke kandıdat usyný jónindegi otyrys hattamasynan úzindi, óziniń Prezıdenttikke kandıdat bolyp daýysqa túsýge kelisim berý jónindegi ótinishti, ómirbaıandyq málimetterin, Ortalyq saılaý komıssııasynyń shotyna saılaý jarnasyn engizgenin kýálandyratyn qujatty, jeke basyn kýálandyratyn qujattyń kóshirmesin, joǵarǵy bilim týraly dıplomdarynyń kóshirmeleri men memlekettik qyzmette nemese saılanbaly memlekettik laýazymdarda jumys tájirıbesiniń bar ekenin rastaıtyn qujat ótkizgen bolatyn.
Endi bul joly da lıngvıstıkalyq emtıhan aldynda aıtylǵandaı úsh kezeń boıynsha ótti: taqyrypqa saı jazbasha tapsyrma jazý, mátin oqý jáne lıngvıstıkalyq komıssııa bergen taqyrypta kópshilik aldynda keminde on bes mınýt sóz sóıleý. Emtıhan tapsyrylǵannan keıin lıngvıstıkalyq komıssııa talqylaý ótkizip, qorytyndylady. Oǵan lıngvıstıkalyq komıssııanyń barlyq músheleri qatysty. Ol qorytyndy boıynsha fılosofııa ǵylymdarynyń doktory, professor, Qazaqstan Respýblıkasy Ulttyq ǵylym akademııasynyń akademıgi Ǵarıfolla Esim: - Búgin biz lıngvıstıkalyq komıssııanyń kezekti otyrysyn ótkizdik. Oǵan Qazaqstan Resýbıkasynyń Prezıdenttigine kandıdat Sádibek Túgel kelip, memlekettik tildi erkin meńgergendigin aıqyndaý úshin emtıhan tapsyrdy. Emtıhan sharty boıynsha ol úsh bólimnen turady: birinshi kezkeńge saı biz usynǵan taqyryp boıynsha shyǵarma jazýy kerek. Bul oraıda Sádibek Túgel "Táýelsiz memleketter dostastyǵy: tarıhy jáne búgini". Osy taqyrypta kandıdat berligen tapsyrmany oryndap, óziniń memlekettik tildi erkin meńgergendigin kórsetti. Árıne, bul jerde bizdiń kórsetken keıbir qateler týraly eskertpeler bar. Biraq onyń memlekettik tildi erkin meńgerýine eshqandaı bógeti joq. Ekinshi kezeńde Sádibek Túgel Ábish Kekilbaıdyń "Dala balladasyn" tańdap alyp, sodan úsh bettik mátindi mánerlep oqyp berdi. Osy oqý barysynda ol óziniń oqý mádenıtiniń joǵary ekenin kórsetti. Bul jaǵynan da Sádibek Túgel memlekettik tildi erkin meńgergendigin aıqyndady, - dedi.
Úshinshi kezeń Qazaqstan Respýblıkasynyń Prezıdenttigine kandıdat sóz sóıleý mádenıetin kórsetýi tıis bolatyn. Bul jóninde Ǵarıfolla Esim: - Úshinshi kezeń tapsyrmasyna saı Sádibek Túgel "Babalar sózi – danalyq kózi" degen taqyrypty aldy. Osy taqyryp boıynsha sóz sóıledi. Sonda ol óziniń qazaq tilinde erkin sóılep, pikirin de erkin jetkize alatyndyǵyn tolyq dáleldep berdi. Demek, ol bul kezeń sharty boıynsha da memlekttik tildi erkin meńgergendigin kórsetti. Sondyqtan bizdiń bul birinshi, ekinshi jáne úshinshi tapsyrmalarymyzǵa qatysty qorytyndymyz, ıaǵnı naqty aıtqanda lıngvıstıkalyq komıssııanyń sheshimi boıynsha Qazaqstan Respýblıkasynyń Prezıdenttigine kandıdat Sádibek Túgel memlekettik tildi erkin meńgergen. Bizdiń soǵan kózimiz naqty jetti, - dedi.
