Nur-Sultan qalasynda áleýmettik kómektiń kólemi men sany artqanyn jetkizgen ákim Baqyt Sultanov: «Elbasynyń tapsyrmasyna sáıkes Nur-Sultan qalasy óz tarapynan bıýdjettik baǵdarlamalardaǵy kúte turatyn sharalardy artqa qaldyryp, únemdeý jumysynyń arqasynda áleýmettik salaǵa qosymsha qarjy bólip otyr. Naqty 13 shara qabyldandy. Oǵan 8 mlrd teńgege jýyq qarjy bólinbek. Olardyń 5-i búgingi bıýdjette bar. Al 8-i osy aıdyń aıaǵynda máslıhatta bıýdjetti naqtylaý kezinde naqtylanady», deı kelip, eń aldymen osyǵan deıin kórsetilip kele jatqan bes túrli áleýmettik kómekke qosymsha qarjy bólingenin aıtty.
Atap aıtqanda, buǵan deıin elordada 2 myń otbasy turǵyn úı kómegine ıe bolǵan bolsa, bıyl onyń kólemi 18 paıyzǵa artpaq. Ekinshiden, 18 jastan asqan múmkindigi shekteýli tulǵalardy kútýshilerdi tegin jolaqymen qamtamasyz etý úshin qalalyq bıýdjetten 1,3 mlrd teńge qarastyrylyp otyr. Úshinshi, úıde bilim alatyn múmkindigi shekteýli balalarǵa kórsetiletin kómek 25 myń teńgege deıin (1,5 esege) joǵarylaǵan. Tórtinshi, memlekettik áleýmettik tapsyrys aıasynda tegin tehnıkalyq jáne kásibı bilim alýǵa qoldaý kórsetiledi. Bul úshin 3 myń adamǵa 1 jarym mlrd teńge bólingen. Besinshi, bilim berý, densaýlyq saqtaý jáne áskerı salada jumys isteıtin bıýdjettik qyzmetkerlerge beriletin turǵyn úı sertıfıkatynyń sanyn 2 myńǵa jetkizý úshin bıýdjetten 2 mlrd teńge qarastyrylǵan.
«Qosymsha 8 áleýmettik sharany aıtatyn bolsaq:
1) Kópbalaly otbasylardyń balalary mektepke, kolledjge, joǵary oqý ornyna tegin barý úshin 200 mln teńge bólinip otyr. Iаǵnı 36 myń bala tegin jolaqymen qamtylady.
2) Buǵan deıin elordamyzdaǵy barlyq mektepterde oqýshylar 4-synypqa deıin tegin ystyq tamaqpen qamtylǵan bolsa, 1 qyrkúıekten bastap kópbalaly otbasylardyń balalary 1-11 synypqa deıin tegin tamaqtana alady. Qazir 32 myń balaǵa tegin tamaq berilý úshin 1 mlrd-qa jýyq teńge qarastyryldy.
3) Kópbalaly jáne az qamtylǵan otbasylardyń balalaryna, jetim balalarǵa arnaıy saýyqtyrý demalysy uıymdastyrylady. Bıyl biz 10 myń balaǵa 500 mln teńge bóldik.
4) Mektep formasymen jáne oqý quraldarymen tegin qamtamasyz etý úshin 38 mln teńge bólinip, 32 myń balaǵa beriledi.
5) Kópbalaly jáne az qamtylǵan otbasylardyń balalary, sondaı-aq múgedek balalar balabaqshaǵa tegin barýyna qoldaý kórsetiletin bolady. Búgingi kúni «Balapan» baǵdarlamasy boıynsha ár balaǵa oryn úshin biz 27 myń teńge tólep otyrmyz, al sizder tamaq úshin 17 myń teńge tóleısizder. 1 qyrkúıekten bastap kópbalaly otbasylardyń balalaryna bul qarjy bıýdjetten tólenetin bolady. Bul úshin de bıylǵa jarty mlrd teńge bólýdi kózdep otyrmyz.
6) 180 myń balaǵa elordanyń JOO-na tanymal mamandyqtar boıynsha bilim alýǵa arnaıy granttar bólinbek. Bul úshin taǵy 25 mln teńge bólinip, jylyna ár balaǵa 500 myń teńge beriledi.
7) Kópbalaly analarǵa tis dárigeri qyzmetin tegin usyný úshin bıýdjetten 400 mln teńge qarastyryp otyrmyz. 8) Kópbalaly otbasylarǵa qysqy otynmen kómektesý úshin qosymsha 1000 otbasyǵa qarajat bólindi», dedi Nur-Sultan ákimi.
