Sondaı-aq, jıynda Densaýlyq saqtaý vıse-mınıstri Qamaljan Nadyrov Qazaqstandaǵy azyq-túliktiń sapasy men qaýipsizdigi, ony jiti baqylaý jaıly baıandady.
Elimizde 2018 jyldan bastap mektep oqýshylarynyń tamaqtaný rasıony boıynsha birińǵaı standarttar engizildi. Oqý oryndarynda tátti jáne gazdalǵan sýsyndardy satýǵa tyıym salynǵan. As tuzyn ıodtaý, un jáne basqa da birqatar azyq-túlikti mıneraldy-dárýmenmen baıytýǵa qatysty jumystar júrgizilýde. Al iri saýda ortalyqtarynda «Durys tamaqtanýǵa arnalǵan azyq-túlik» sóreleri ashyldy.
Aýrýdyń aldyn alý maqsatynda 2018 jylǵy medısınalyq-sanıtarııalyq alǵashqy kómek boıynsha Astana deklarasııasy qabyldandy. Profılaktıkaǵa negizdelgen qujat - qoǵamdyq densaýlyq saqtaý salasynyń ózegi.
2019 jyly Qazaqstanda qoǵamdyq densaýlyq saqtaý jáne medısınalyq-sanıtarııalyq alǵashqy kómekke bólinetin qarjy 60%-ǵa artady. Arnaıy zań jobasy qazir daıyndalýda. «Halyq densaýlyǵy jáne densaýlyq saqtaý júıesi týraly» kodekske durys tamaqtanýǵa qatysty ózgerister engizip, sáýirdiń sońyna deıin Úkimettiń qaraýyna jiberiledi.
Elimizde óndirýshilerge nan-toqash ónimderindegi tuzdyń mólsherin azaıtý týraly talap qoıyldy. Mamandar 1 keli unǵa 2 grammnan artyq tuz qosylmasyn degen toqtamǵa keldi. Endi sút ónimderindegi qant mólsherin azaıtý qolǵa alynady.
Sımpozıýmda balalardyń tamaqtaný rasıony, mekteptegi tamaqtaný júıesi, mektepke deıingi mekemelerdegi azyq-túlik sapasyn jaqsartý syndy máseleler talqylandy.
Jıynǵa Qazaqstan, О́zbekstan, Tájikstan, Túrkimenstan, Qyrǵystan, Armenııa, Grýzııa jáne Ázirbaıjan Parlamentiniń depýtattary, Densaýlyq saqtaý, Aýyl sharýashylyǵy, Qarjy, Bilim jáne ǵylym mınıstrlikteriniń ókilderi qatysýda.
Uıymdastyrýshylar: BUU-nyń Azyq-túlik jáne aýyl sharýashylyǵy uıymy, QR Densaýlyq saqtaý mınıstrligi, Qoǵamdyq densaýlyq saqtaý ulttyq ortalyǵy, BUU Balalar qory (IýNISEF).
IýNISEF pen Qazaqstan arasyndaǵy memorandým aıasynda QR DSM Qoǵamdyq densaýlyq saqtaý ulttyq ortalyǵy eki jyl boıy О́ńirlik platformanyń hatshylyǵyn basqarady.
Sımpozıým sáýirdiń 25 men 26 aralyǵynda ótedi.
