Aımaqtar • 25 Sáýir, 2019

Oraldan shyqqan otyzynshy keme

790 ret kórsetildi

Oral qalasyndaǵy «Zenıt» zaýytynyń konveıerinen shyqqan taǵy bir jańa keme saltanatty jaǵdaıda sýǵa túsirildi. Bul elimizdiń sýdaǵy shekarasyn qorǵaý úshin Qazaqstan Respýblıkasy Ulttyq Qaýipsizdik komıtetiniń tapsyrysymen jasalǵan otyzynshy keme.

Jyl saıyn kóktemde, Jaıyq pen Shaǵan ózenderiniń arnasy tolyq kezinde «Zenıt» zaýytynan shyqqan jańa kemeniń sýǵa túsirilip, Jaıyqty boılap Kaspııge attanatyny oraldyqtar úshin dástúrli kóriniske aınalǵan.

Batys Qazaqstan oblysynyń ákimi Altaı Kólginov jańa kemeniń tusaýkeseri týraly 1 sáýirde habarlaǵan bolatyn. «Otanymyzdyń keme shyǵaratyn Zenıt zaýyty kezekti áskerı kemeni sýǵa túsirýge daıyndalýda. Zaýytty modernızasııalaý men dıversıfıkasııa máselesi kún tártibinde» degen edi óńir basshysy óziniń týıtter paraǵynda.

Joba boıynsha «Barys» dep atalǵan 0300 markaly kemeniń buǵan deıin 5 danasy shyqqan eken. Eń alǵashqysy 2006 jyly tapsyrylyp, «Sardar» degen at alǵan. Búgingi kemege «Nur-Sultan»degen at berilipti.

- Búgin elimizdiń úlken meıramy – birlik merekesi qarsańynda «Nur-Sultan» áskerı kemesi sýǵa túsirildi. Zamanaýı jaýyngerlik keme elimizdiń teńiz shekarasyn kúzetýge kirisedi. Áskerı keme óndirisi – memleketimizdiń damý deńgeıin kórsetedi. Memlekettiń qoldaýymen qurastyrylǵan bul keme oraldyq «Zenıt» zaýytynyń 30-shy ónimi boldy. О́ńir turǵyndary atynan jaýyngerlik kemeniń ómirge kelýine atsalysqan «Zenıt» zaýytynyń jumysshylaryna alǵysymdy bildiremin. Áskerı keme ashyq aspan astynda Otanymyzdyń tynyshtyǵyn kúzete bersin!- dedi Altaı Kólginov Shaǵan ózenindegi keme túsirý aılaǵynda ótken saltanatty jıynda.

Qazaqstan Respýblıkasy Ulttyq Qaýipsizdik komıteti Shekara Qyzmetiniń dırektory, UQK tóraǵasynyń orynbasary, general-maıor Darhan Dilmanovtyń aıtýynsha, oraldyq kemelerdi Reseı Federasııasy, Iran, Ázirbaıjan teńiz mamandary da joǵary baǵalaıdy eken.

Búgingi saltanatty sharada «Zenıt» zaýytynyń dırektory Vıacheslav Valıev «Shekarany úzdik kúzetkeni úshin» medalymen marapattaldy. Al zaýyttyń bas tehnology Tımýr Traısov pen №6 seh bastyǵynyń orynbasary Nıkolaı Hamko II dárejeli «Shekara qyzmetiniń úzdigi» tósbelgisine ıe boldy.

«Barys» kemeleri Kaspıı teńizinde memlekettik shekarany qorǵap, kontrabandalyq áreketterdi, teńiz qaraqshylaryn, zańsyz balyq aýlaýshylardy quryqtaýǵa arnalǵan. Ásirese bógde júzýshilerdi jalǵyz ózi de, áriptesterimen birlesip te qýyp jetip, ustaı alady. Áskerı kemeniń áleýeti jazylǵan anyqtamaǵa qaraǵanda, tipti sýasty dıversanttarymen de kúrese alady eken. Keme quqyqbuzýshylardy jedel quryqtaý úshin qosymsha júzý quralymen jabdyqtalǵan. Jańa kemeniń basqarý júıesi, baılanys quraldary, navıgasııa, shtýrman qondyrǵylary talapqa saı. Kemede ornatylǵan qurylǵy táýligine 4 tonna teńiz sýyn tushyta alady.

Aıta keteıik, «Oral Zenıt zaýyty» AQ «Qazaqstan ınjınırıng» Ulttyq kompanııasy» AQ qurylymyna kiretin kásiporyn.

Jańadan jasalǵan ár kemege jeke ataý berý – burynnan qalyptasqan dástúr. Buǵan deıin «Zenıt» zaýytynan shyqqan, Kaspıı teńizine qyzmetke jiberilgen kemeler men katerlerge «Astana», «Oral», «Almaty», «Taraz», «Aqtaý», «Atyraý», «О́skemen», «Qaraǵandy», ««Egemen», Qazaqstan», «Saryarqa», «Mańǵystaý», «Sarbaz», «Nurly jol», «Qalqan», «Semser», «Jeńis», «Naıza», «Saqshy», «Sardar» syndy ataýlar berilgen.

Sońǵy jańalyqtar

Bir kúnde 3907 adam koronavırýstan aıyqty

Koronavırýs • Búgin, 09:45

15169 adam koronavırýs juqtyrdy

Koronavırýs • Búgin, 09:17

Uqsas jańalyqtar