Oblys attas aýdannyń Zarechnyı poselkesinde turatyn Gúlsara Álmaǵambetovanyń tórt balasy bar. Ol kóp jyl buryn jumys istep júrgen bala baqshadan ketti de, úıde otyryp, ýaqytyn balalarynyń tárbıesine arnady. Qazir balalary ósti. Ol jaqynda «Bastaý» kýrsyn oqyp, sertıfıkat alǵan bolatyn.
«Alǵashynda men isimizdi bastaýǵa qoryqtym. О́ıtkeni bıznespen eshqashan aınalyspaǵan soń, túsinbegenim ras edi. Biraq eshqandaı qıyndyǵy joq eken. Aqmaral Bekmurzaevanyń bıznes-jattyǵýynyń arqasynda bárin de túsindim, yqylasym oıandy» deıdi Gúlsara.
Kóp balaly ana alǵan 3 mıllıon teńge nesıege 10 sıyr satyp aldy. Otbasy buryn tek qus ósirgen bolatyn, sondyqtan alǵashynda sıyrdy kútý olarǵa jeńil bolmady. Gúlsaranyń joldasy, balalary jumylǵanda is ońǵarylyp júre berdi.
«Ázirge sút mol emes, biraq aldaǵy ýaqytta ony kóbeıtemiz degen oıymyz bar. Salyq esebin jasaý qıyn sekildi kórinetin, oǵan kásipkerler palatasynan mamandar kómektesedi. Jalǵyz ǵana qıyndyq bar, ol – jaıylymnyń tarlyǵy» deıdi Gúlsara.
Álmaǵambetovter otbasy ázirge kásibin ornyqtyrý úshin kóp jumys atqarýda. Olar aldaǵy ýaqytta mal sharýashylyǵynan tek sút óndirmeı, ony keńeıtýdi maqsat tutyp otyr.
