Kezdesý aldynda Memleket basshysy Q.Toqaev «Qazaqstan elektrolız zaýyty» aksıonerlik qoǵamynyń jumysymen tanysty. Prezıdentke kásiporynnyń óndiristik qýaty jylyna 250 myń tonna alıýmınıı shyǵarýǵa qaýqarly ekeni málimdeldi.
Memleket basshysy óz sózinde Pavlodar oblysy elimizdiń damýyna zor úles qosyp otyrǵan iri óndiristik óńirlerdiń biri ekenin atap ótti.
– Táýelsizdik jyldary Ertis óńiriniń ekonomıkalyq áleýeti edáýir nyǵaıdy. Sizderdiń oblystaryńyz Qazaqstannyń ónerkásiptik jáne energetıkalyq flagmandarynyń birine aınaldy. Elbasy usynǵan ındýstrııalandyrý baǵdarlamasynyń arqasynda óńirde quny 988 mıllıard teńge bolatyn 90 joba júzege asyryldy. Bul jobalar janarmaı-energetıkalyq keshenin, munaı-hımııa, metallýrgııa jáne basqa da salalardy qamtıdy, – dedi Qazaqstan Prezıdenti.
Qasym-Jomart Toqaev oblys basshylarynyń nazaryn halyqtyń ál-aýqatyn arttyrýǵa baılanysty máselelerge aýdardy.
– Pavlodar oblysy aýyldardy aýyz sýmen qamtamasyz etý jóninen elimiz boıynsha kórsetkishi eń tómen óńirlerdiń biri. Bul máseleni júıeli túrde jedel sheshý kerek. «О́ńirlerdi damytýdyń 2020 jylǵa deıingi baǵdarlamasy» aıasynda 2018 jyly sýmen jabdyqtaý jáne sý tartý júıelerin jańǵyrtý úshin respýblıkalyq bıýdjetten 2,7 mıllıard teńge qarjy bólindi. Úkimet pen ákimge árbir bólingen teńgege qatań baqylaý jasaýdy tapsyramyn. Sonda ǵana halyqty sýmen qamtamasyz etý isin ýaqtyly jáne tıimdi sheshe alamyz, – dedi Memleket basshysy.
Qazaqstan Prezıdenti atalǵan óńir úshin ekologııa máselesi ózekti kúıinde qalyp otyrǵanyn atap ótti.
– Biz ult densaýlyǵyna, salamatty ómir saltyn nasıhattaýǵa erekshe nazar aýdaramyz. Alaıda, kásiporyndardyń qaldyqtaryna baqylaýdyń joqtyǵynan bizdiń óndiristik ortalyqtarymyzda kúrdeli ekologııalyq ahýal qalyptasyp otyr, – dedi Qazaqstan Prezıdenti.
Memleket basshysy oblys ákimine Úkimetpen birlesip, Jastar jyly aıasyndaǵy Jol kartasynda qarastyrylǵan sharalardy júzege asyrýdy tapsyrdy.
– Bizge jumyspen qamtý salasyndaǵy is-qımyldardy jandandyrý kerek. Sondaı-aq jumys kúshi kóp aımaqtardan kóship keletin halyqty qoldaý sharalaryn kúsheıtýimiz qajet. Búginde oblystyń jyl saıynǵy jumys kúshine degen qajettiligi 25 myńnan astam adamǵa jetti. Muny sheshýdiń joly qolaıly ınfraqurylymdar, qoljetimdi jáne jalǵa beriletin baspanalar qurylysy, – dedi Qasym-Jomart Toqaev.
Sońynda Memleket basshysy óńirlerdi damytý jáne halyqtyń ál-aýqatyn arttyrý árdaıym erekshe baqylaýda bolatynyn aıtyp, sottardyń qyzmeti men zań ústemdigin qamtamasyz etý máselesine aıryqsha toqtaldy.
– Ádilettilik – qyzmettik jaǵdaıy men áleýmettik mártebesine qaramastan, barsha azamattyń zań aldyndaǵy teń bolýy. Zańnyń ústemdik etýi degenimiz osy. Bul sottar qyzmetine aralaspaýdy kózdeıdi. Degenmen, keı kezderi quqyq buzýshylyqtarǵa qatysty olardyń shyǵarǵan úkimderi azamattarymyz úshin oǵash jáne aqylǵa qonymsyz bolyp kórinedi, – dedi Qazaqstan Prezıdenti.
Qazaqstan Prezıdenti Qasym-Jomart Toqaev kelesi kezekte Pavlodar munaı-hımııa zaýytyna baryp, atalǵan óndiris ornynyń jumysymen tanysty.
Qazaqstan Prezıdentine kásiporynnyń qazirgi ýaqytta avtomobıl janarmaıyn, reaktıvti qozǵaltqyshtarǵa arnalǵan janarmaı otynyn, dızeldi jáne qazandyq otynyn, ózge de munaı ónimderin, sondaı-aq kommýnaldyq-turmystyq maqsatta gaz óndiretini týraly baıandaldy. Zaýyttyń jyldyq qýaty – 5,1 mıllıon tonna. Onyń ónimderi ishki naryqqa jetkiziledi, sonymen qatar Reseıge, О́zbekstanǵa, Qytaıǵa, AQSh-qa, Nıderland eline, Italııaǵa jáne Ýkraınaǵa eksporttalady.
Qasym-Jomart Toqaev eńbek ujymymen áńgimelesý barysynda óndiristik qýatyna aýqymdy jańǵyrtý jumystary júrgizilgen Pavlodar munaı-hımııa zaýytynyń el ekonomıkasyndaǵy róli erekshe ekenin atap ótti.
Kásiporyn jumysshylary otandyq óndiriske qoldaý kórsetkeni úshin Qazaqstan Prezıdentine alǵys bildirdi.
Bul Memleket basshysy Q.Toqaev Jastar bastamalaryn damytý ortalyǵyna bardy.
Bul «bir tereze» qaǵıdaty boıynsha jastarǵa qyzmet kórsetetin respýblıkadaǵy alǵashqy mekeme sanalady. Ortalyq aımaq jastaryna jumysqa ornalasý, memlekettik turǵyn úı baǵdarlamalaryna qatysý, kásipkerlikti damytý máseleleri boıynsha aqparattyq-konsýltasııalyq kómek kórsetedi. Jastardy quqyqtyq, psıhologııalyq turǵydan qoldaý jáne kásibı baǵdar berý ortalyq jumysynyń negizgi baǵyttarynyń biri. Munda aıyna 2 myńnan astam adamǵa qyzmet kórsetiledi.
Qasym-Jomart Toqaev jastarǵa aıtqan sózinde táýelsizdiktiń alǵashqy kúnderinen bastap Elbasynyń óskeleń urpaqqa erekshe kóńil bólgenin atap ótti. Memleket basshysy jastardyń barlyq bastamasyna qoldaý kórsete beretinin jetkizdi.
Saparynyń sońynda Prezıdent Qasym-Jomart Toqaev hımııa-bıologııa baǵytyndaǵy Nazarbaev zııatkerlik mektebinde boldy. Mektep dırektory Rınat Jumabaev Prezıdentti mekteptiń tynys-tirshiligimen tanystyrdy. «2013 jyly ashylǵan mektepte qazir 644 oqýshy bilim alýda, – dedi R.Jumabaev. – 60 oqý kabınetiniń 11-i zerthana, eki sportzal, jattyǵý zaly, 378 oryndyq májilis zaly, 305 oryndyq ashana men kitaphana, psıhologtyń kabıneti, baspasóz ortalyǵy, medısınalyq blok, mýzykalyq jáne horeografııalyq kabınetter bar. Mýltımedııalyq jabdyqtarmen qamtamasyz etilgen. Barlyǵy 131 pedagog jumys isteıdi».
Mekteptiń 11-synyp oqýshysy Dııar Tólenov Nazarbaev zııatkerlik mektebine 7-synypta oqýǵa túskenin aıtty. «Indonezııada, Reseıde, Portýgalııada, Vetnamda jáne Aýstralııada ótken halyqaralyq pán olımpıadalarynyń júldegeri atandym, – dedi ol. – Bul – meniń ustazymnyń, jattyqtyrýshymnyń birlesken jumysynyń jáne mekteptegi búkil qoldaýdyń nátıjesi. Fızıkadan olımpıada – men úshin ózin ózi damytýdyń tásili jáne meniń bolashaq mamandyǵym. Bolashaqta fızıka salasynyń ǵalymy bolsam deımin».
Prezıdentke oblys ortalyǵyndaǵy №34 mekteptiń fızıka pániniń muǵalimi Jasulan Meńdibaev óńirdegi bilim salasynda qandaı jańashyldyqtar qoldanylatynyn aıtyp berdi. «Kóbi fızıkany qıyn pán dep oılaǵanmen, men úshin olaı emes – dedi pedagog. – Sabaqtarymda shynaıy ómirde bolǵan jaǵdaılar arqyly tájirıbege negizdelgen tásilderdi qoldanamyn. Sondyqtan «Fızıka ınfografıkasy» kómekshi quralyn jasadym. Ol oqýshylaryma fızıkany qyzyqty jáne kúndelikti ómirdegi tanymdyq ǵylym retinde qabyldaýǵa kómektesedi».
Muǵalimdi tyńdaı otyra, Q.Toqaev avtordan fızıkadan esepter jınaǵyn tartý etýin ótindi jáne bos ýaqytynda onyń esepterin shyǵarýǵa ýáde berdi.
Q.Toqaev «Qazirgi zamanǵy Qazaqstan» kabınetimen tanysty. Oqýshylar ózderiniń ǵylymı jumystary týraly baıandady.
– Bilim – eń qymbat qazyna, – dedi Prezıdent. Sondyqtan talmaı, sharshamaı izdenip, bilim alý kerek. Bul – eń tańdaýly mektepterdiń biri. Sapaly bilim alý úshin barlyq múmkindik jasalǵan.
Pavlodar oblysy
