«Qazaqstan temir joly» UK» AQ Basqarma tóraǵasy Saýat Myńbaev 2019 jyldyń 6 aqpanynda jyldy qorytyndylaǵan keńeıtilgen otyrysta qaýipsizdik pen eńbek jaǵdaıynyń jaqsarýyn qamtamasyz etý boıynsha árbir basshyǵa naqty tapsyrmalar berip, eń basty basymdyq – qaýipsizdik pen eńbekti qorǵaý ekendigin myqtap eskertken bolatyn. Ár temirjolshynyń densaýlyǵy – negizgi qundylyq ekenin qaperge alsaq, kompanııada eńbek etetin qyzmetkerlerdiń ómiri men densaýlyǵyna nuqsan kelmeýi basty nazarda bolýy tıis.
Sondaı-aq osy jaqynda ǵana, 16 sáýirde QTJ Basqarma tóraǵasynyń birinshi orynbasary Q.Álmaǵambetovtiń tóraǵalyǵymen Bas kólik prokýratýrasy, Ishki ister mınıstrligi, Indýstrııa jáne ınfraqurylymdyq damý mınıstrligi ókilderiniń jáne kompanııa mamandarynyń qatysýymen dástúrli qozǵalys qaýipsizdigi taqyrybyndaǵy dóńgelek ústel ótti. Qozǵalys qaýipsizdigi problemalarymen qosa onda adamdardyń óz betimen asa qaýipti aımaq bolyp tabylatyn temir jolǵa shyǵyp ketýi jaǵdaılary da nazardan tys qalǵan joq. Jol boıynda eldi mekenderdiń kóp ekenin eskersek, bul da bir úlken problemalardyń biri. Qazaqta «Saqtansań – saqtaıdy!» degen eskertpe sóz bar emes pe? Eger osyǵan súıener bolsaq, onda ár adam óz ómirine jaýapty ekendigin taǵy bir qaperge sala ketsek artyq etpes.
Al endi óndiristik jaraqatqa qaıta oralsaq. Onyń deńgeıin tómendetýde kóptegen is-sharalar atqarylǵanyna qaramastan, áli de sheshimin kútken máseleler kezdesedi. Aǵymdaǵy jyldyń 28-29 naýryzy aralyǵynda Atyraý qalasynda ótken «Bizdiń qaýipsizdigimiz – bizdiń ómirimiz!» atty bas ınjenerler forýmynda da bul másele jan-jaqty talqylandy. Reti kelgende aıta keteıik, sol Atyraý qalasynda ornalasqan Aqjaıyq belgi berý jáne baılanys dıstansııasy 26 jyl boıy birde-bir apattyq jaǵdaılarǵa jol bermegendigi jáne ózge de jergilikti kásiporyndardyń 15-20 jyl qatarynan úlgili jumys istep kele jatýy osy qalada bas ınjenerler quryltaıyn ótkizýge sebepshi boldy. Sol jıynda jasaǵan baıandamasynda «QTJ» UK» AQ bas ınjeneri Batyr Kotyrev sońǵy on jylda óndiristik jaraqat deńgeıiniń kemı túskenin óndiriske engizilip jatqan jańashyldyqtarmen baılanystyrdy.
2018 jyly kompanııa jáne onyń enshiles kásiporyndarynda óndiristik jaraqat deńgeıin 28-ge kemitýge qol jetkizilse, bul ótken jylmen salystyrǵanda 6 jaǵdaıǵa kem eken. Salada jaraqatqa úsh mamandyq: jol monteri, poıyz qurastyrýshysy jáne lokomotıv mashınısiniń kómekshisi beıindi keledi desek, jalpy jaraqattyń jartysyna jýyǵy osy mamandyq ıeleriniń enshisinde eken. Teksere kelgende sol óndiristik jaraqat jaǵdaılarynyń kópshiliginde jumysshylardyń qarapaıym qaýipsizdik erejelerin saqtaı bermeıtindigi kóńildi qulazytpaı qoımaıdy. Budan basqa, 78 qaıǵyly jaǵdaıdyń 59-y óndirispen baılanysty emestigi de anyqtalyp otyr. Kezekti medısınalyq tekseristen ótken keıbir qyzmetkerlerdiń jumys oryndarynda jantásilim etken 25 jaǵdaıy tirkelipti. Bul 2017 jylmen salystyrǵanda 2 esege óskendigin kórsetedi. Bul medısınalyq qyzmet sapasynyń syn kótermeıtindigin baıqatady.
Nóldik jaraqat jaǵdaıyn qurýǵa baǵyttalǵan álemdik ozyq tájirıbeler men jyldyq qorytyndylar boıynsha qabyldanǵan naqty sheshimder 2019 jyldyń qaýipsizdik salasyndaǵy negizgi mindetterin aıqyndaýǵa múmkindik berdi. Ýákiletti organnyń normatıvterine sáıkes QjEQ mamandar shtatymen tolyqtyrý – ýaqyt talaby. Jáne de kompanııa tarapynan zańnamamen, ýákiletti organdardyń aktilerimen bekitilen, qor jáne kásipodaq bekitken qaýipsiz jumystyń negizgi sharttary jan-jaqty eskerilgendigin aıta ketken oryndy. Sharýashylyq jetekshilerinde qaýipsiz eńbek jaǵdaıyn qoldaý úshin qajetti quraldar jetkilikti. Sondyqtan da basshylar, mamandar, tolyqtaı eńbek ujymy belgilengen jospardy oryndaý úshin barlyq kúsh-jigerlerin jumsaýy tıis. Jáne de ár sharýashylyqqa nóldik jaraqat strategııasyn júzege asyrý maqsatynda óz baǵdarlamalaryn ázirleýge múmkindik berilip otyr. Budan basqa, forýmdar, konferensııalar uıymdastyrý, BAQ-pen baılanystardy nyǵaıtý máselesi de kún tártibinde tur. Mamandandyrylǵan merdigerlerdiń naqty talaptardy qamtyǵan jumys oryndaryn attestasııalaýdy uıymdastyrýdy biryńǵaı korporatıvtik tártipte júzege asyrýy kózdelgen. Qyzmetkerlerdi mindetti medısınalyq tekserýlermen qamtý, medısınalyq qyzmet sapasyna talaptardy kúsheıtý jaǵy da nazardan tys qalmaıdy. Eń bastysy, «Senim sertıfıkattaryn» sharýashylyqtarǵa tapsyrý arqyly, olardyń nóldik jaraqat qaǵıdalaryn ustaýyn yntalandyrý jaǵy da qolǵa alyndy. Bunyń barlyǵy da jaraqattardyń aldyn alýdyń alǵysharttary sanalady.
Mine, QTJ sheńberinde osy baǵyttaǵy jumystar júrip jatyr jáne ol jalǵasa beredi. Basty ustanym – «nóldik jaraqat» tujyrymdamasyn júzege asyrý.
Asqar ISAQOV,
BAQ-pen jumys júrgizý departamentiniń menedjeri
