Atyraýda Qazaqstan halyqtary birligi kúnine arnalǵan merekelik sharalar bastaldy. Sultan Beıbarys alańyndaǵy konserttik baǵdarlama myńnan astam kórermendi jınady. Mereke qonaqtary úshin jergilikti 500-ge jýyq ártis óner kórsetti.
Atyraý oblysynyń ákimi Nurlan Noǵaev quttyqtaý sózinde el aýmaǵynda ómir súrip jatqan ulttar men ulystardyń birligi men kelisimi arqasynda Qazaqstanda beıbitshilik saltanat quryp turǵanyn atap ótti.
- Qazaqstanda 130, bizdiń oblysta 20-dan astam ult pen ulystyń ókili turady. Ultaralyq tatýlyq pen kelisimniń arqasynda Qazaqstan búkil álemge dinaralyq, konfessııaaralyq saıasaty joǵary damyǵan el retinde belgili bolyp otyr. Osy úlgi men tájirıbeni bolashaq qazaqstandyqtarǵa amanattaýymyz kerek,-dedi óńir turǵyndaryna Nurlan Noǵaev.
Merekelik sharalar QR Ulttyq gvardııasy ansambliniń konsertimen jalǵasty. Búgin saǵat 20.00-de Atyraý turǵyndary men qonaqtary úshin aımaqtaǵy shyǵarmashylyq ujymdar merekelik konserttik baǵdarlama usynady.
Atyraý
