Bıyl 30 sáýirde kópbalaly otbasylardy baspanamen qamtamasyz etý maqsatynda Parlament turǵyn úı qatynastary máseleleri jónindegi zańdy qabyldady. Qujatty iske asyrý Qazaqstan Respýblıkasy Úkimetine ákimdiktermen birlesip qysqa merzim ishinde elimizdiń barlyq óńirlerindegi kópbalaly otbasylarǵa páter berýdi bastaýǵa múmkindik berdi.
Prezıdent Ákimshiliginiń, Parlament pen Úkimettiń úılesimdi atqarǵan jumystarynyń nátıjesinde az qamtylǵan otbasylardyń turǵyn úı jaǵdaılaryn jaqsartýdyń júıeli sharalary qabyldandy.
Bıyl mamyr aıynda jalpy elimizde 2019 jylǵa josparlanǵan 6 myń kópbalaly otbasynyń 1,2 myńyn baspanamen qamtamasyz etý kózdelgen.
Búginde alǵashqy 24 páter Nur-Sultan qalasynda, 15-i Shymkent qalasynda berilgen. Pavlodar oblysynyń kópbalaly otbasylaryna — 76, Qaraǵandy oblysynda — 27, Aqtóbe oblysynda — 25, Almaty oblysynda — 20, Mańǵystaý oblysynda — 18, Jambyl oblysynda — 17, Shyǵys Qazaqstan oblysynda — 11, Batys Qazaqstan oblysynda — 10, Aqmola oblysynda — 6 páter berildi.
15 mamyr kúni Atyraý oblysyndaǵy 50 kópbalaly otbasyny turǵyn úımen qamtamasyz etý josparlanǵan.
Jergilikti atqarýshy organdardyń bergen málimetine sáıkes, 32 myń kópbalaly otbasy baspana alýǵa kezekte tur.
Kópbalaly jáne az qamtylǵan otbasylardy turǵyn úımen qamtamasyz etý boıynsha alǵa qoıylǵan mindetterdiń iske asyrylý barysy Úkimettiń erekshe baqylaýyna alynǵan.
