Jedelhatta Memleket basshysy barsha Qazaqstan halqynyń jáne jeke óziniń atynan Narýhıtony Japonııa Imperatory taǵyna otyrýyna oraı quttyqtap, táýelsizdigimizdiń alǵashqy kúnderinen bastap Qazaqstannyń Tuńǵysh Prezıdenti N.Á.Nazarbaev elimizdiń Japonııamen yntymaqtastyǵyn damytýǵa erekshe mán bergenin atap ótti.
«Qysqa tarıhı merzim ishinde elderimiz arasyndaǵy qarym-qatynastar keńeıtilgen strategııalyq áriptestik deńgeıine jetti. Qazaqstan Respýblıkasynyń Prezıdenti retinde elimizdiń syrtqy saıasattaǵy sabaqtastyqty saqtap, halyqtarymyzdyń ıgiligi úshin Qazaqstan men Japonııa arasyndaǵy ózara tıimdi yntymaqtastyqty odan ári nyǵaıtýǵa kúsh salamyn. Búginde Japonııa bizdiń elimiz úshin Azııadaǵy senimdi ári strategııalyq seriktes sanalady. Sizdiń qoldaýyńyzben «Reıva» dáýirinde jan-jaqty yqpaldastyq aıasyn tereńdetý úrdisi odan ári jalǵasyn tabatynyna erekshe úmit artamyn», delingen jedelhatta.
Sońynda Qasym-Jomart Toqaev Japonııa Imperatoryna mol tabys, al dostas japon halqyna bereke jáne turaqtylyq tiledi.
