«Zenıt» mádenıet úıinde ótken jıynǵa 500-den astam jastar qatysty. Batys Qazaqstan ınnovasııalyq jáne telekommýnıkasııalar qyzmeti ýnıversıteti men M.О́temisuly atyndaǵy Batys Qazaqstan memlekettik ýnıversıtetiniń ustazdar quramy, belsendi stýdent jastar elimizdegi asa mańyzdy saılaý dodasyna qatysyp jatqan partııa úmitkeriniń baǵdarlamasyn den qoıa tyńdady. Kezdesýde taratylǵan úgit-nasıhattyq materıaldar, sahna tórindegi alyp monıtordan kórsetilgen beınerolıkter qazaq jáne orys tilderinde saıası partııa atynan synǵa túsken úmitkerdiń saılaýaldy baǵdarlamasyn egjeı-tegjeıli habardar etti.
- Men sońǵy kúnderi elimizdiń ár óńirine sapar shegip, saılaý naýqanyna oraı túrli ujymdarmen kezdesip júrmin. Osyndaı kezdesýlerde halyq bizdiń úmitkerimiz Danııa Espaevanyń qarapaıym adamı tulǵasyna, jeke ómirine qatysty saýaldardy jıi qoıady. Shynynda da adamnyń jeke ómirin jaqyn bilgende, ony jańa qyrynan tanı túsetinimiz ras. Danııa Mádıqyzy kópbalaly otbasynda dúnıege kelgen, bir jasynda anasynan, 12 jasynda ákeden aıyrylyp, taǵdyrdyń qıyndyǵyna shyńdalyp ósken qaıratker tulǵa. Mektep pen JOO-da tek úzdik oqyp, qarjy salasynda qyzmet etip, adal eńbegimen mansap bıigine shyqqan qaısar qyz. О́ndiristiń ár salasyn, kásipkerliktiń qyr-syryn jetik biletin Danııa Espaeva óziniń qyzmet baspaldaǵynda tek qana kásibılikti, adaldyq pen shynshyldyqty murat etken. Ol Parlament qabyrǵasynda júrgende de elge paıdaly talaı is atqardy. Naqty bir mysal keltire keteıin: Anaý bir jyldary pedıatr mamandyǵy medısınalyq oqý oryndarynan alynyp, emhanalarda balalar úlkendermen birge qarala bastaǵan kezde aldymen dabyl qaǵyp, bul keleńsizdikti joıýǵa atsalysqan da – Danııa Mádıqyzy bolatyn. Bizdiń úmitkerdiń qoǵamdy jaılaǵan sybaılas jomqorlyqqa qarsy kózqarasy da erekshe. Jalpy, meniń oıymsha shańyraqta úılesimdilik ornatý, qoǵamdy qoqystan tazartý isine er adamnan góri áıel adam beıim keledi. Danııa Espaeva búgingi Qazaqstan qoǵamyn jańasha ózgertýdiń aıqyn josparyn usynyp otyr. Sondyqtan, 9 maýsym kúni elimizdiń saılaýshylary laıyqty tańdaý jasaıdy dep oılaımyn, - dedi Nur-Sultan qalasynan arnaıy kelgen meıman, «Aq jol» partııasy tóraǵasynyń orynbasary Dmıtrıı Vasılev.
Belgili alashtanýshy ǵalym, Jahansha Dosmuhameduly atyndaǵy «Qaıratker» qoǵamdyq qorynyń tóraǵasy Dámetken Súleımenova da óz sózinde búgingi «Aqjol» partııasy men tarıhı «Alash» qozǵalysynyń arasyndaǵy baılanys, sabaqtastyq týraly naqty mysaldarmen keltirip ótti. Aımaqtyq shtab jetekshisi, partııanyń oblystyq fılıaly tóraǵasy Serik Merǵalıev «Aq jol» partııasynyń qoǵamnyń progressıvti ókilderine, ásirese jastarǵa arqa súıeıtinin basa aıtty.
- Qazaqstan Respýblıkasy Prezıdenttigine úmitker Danııa Espaevanyń saılaýaldy úgit-nasıhat jumystary Batys Qazaqstan óńirinde óte belsendi júrýde. Biz túrli ujymda, JOO, iri kompanııa, óndiris oryndarynda halyqpen jıi kezdesip, oı-pikirin bilip, ózimizdiń úmitkerdiń baǵdarlamasymen tanystyryp júrmiz. Búgingi kezdesýimiz de josparymyzǵa saı ótip jatyr, - deıdi partııa fılıaly tóraǵasynyń orynbasary Rada Haırýsheva.
Kezdesý sońy suraq-jaýapqa ulasty.
Batys Qazaqstan
