Tolaǵaılar nege toqyrady?

2009 jylǵy Jetisý óńi­rin­de ótken dúbirli dodada jer­lesterimiz 4 altyn, 1 kúmis jáne 2 qolany ıelendi. Desek te bir bas júldesi artyq Qytaı eli­niń ókilderi bizden ozyp ketti. Olar­dyń enshisinde – 5 altyn men 6 kúmis. Jerlesterimizdiń ara­synan Svetlana Podobedova (75 kılo), Tatıana Hromova (+75 kılo), Vladımır Sedov (94 kılo) jáne Sergeı Istomın (105 kılo) top jarsa, Iаkov Berh (+105 kılo) kúmis aldy. Maııa Maneza (63 kılo) men Almas О́teshov (85 kılo) qolaǵa qol sozdy. Úshinshi orynda ­– Iran (2 altyn+1 kúmis+2 qola).

2011 jyly Qytaıdyń Týn­lın qalasynda alty júlde alǵa­nymyzben altynshy oryndy qa­na­ǵat tuttyq. Oǵan sebep – altyn júldeniń joqtyǵy. Tatıana Hromova (75 kılo) men Vladımır Sedov (94 kılo) ekinshi oryndy ıelense, Aleksandra Aborneva (+75 kılo), Kırıll Pavlov (77 kılo), Vladımır Kýznesov (85 kılo) jáne Sergeı Istomın (105 kılo) úshinshi satyǵa taban tiredi. Osy jarysta tórt-aq eldiń órenderine bas júlde buıyrdy. Qytaı 12 altyndy oljalasa, qalǵanyn Iran, Makao jáne Ońtústik Koreıa quramalary enshiledi. 

2012 jyly Ońtústik Koreıa­nyń Phenthe­kesinde jetinshi oryn­ǵa turaqtadyq. Bul joly buıyr­ǵany – tórt júlde. Aleksandra Aborneva (+75 kılo) men Nursultan Rahatov (77 kılo) kúmis jáne Gúlnaz Naýryzova (75 kılo) men Igor Vashanov (94 kılo) qola medaldy enshiledi. Jalpy esepte Qytaı (6+5+1) ozsa, odan keıingi oryndardy jarys qojaıyndary (2+2+2) men Iran quramasy (2+1+2) ıemdendi. 

2013 jyly Astanada uıym­das­tyrylǵan Azııa chempıonatynda Soltústik Koreıanyń baǵy jandy. Quramy kil myqtylardan jasaqtalǵan atalmysh memlekettiń ókilderi 4 altyn, 3 kúmis jáne 2 qolany oljalady. Ekinshi jáne úshinshi oryndy Iran (4+1+2) men Qazaqstan (3+1+2) ıelendi. Elorda tórinde dúrkirep turyp ótken dodada Anna Nurmuhambetova (75 kılo), Aleksandra Aborneva (+75 kılo) jáne Aleksandr Zaıchıkov (94 kılo) teńdessiz dep tanylsa, Farhad Harkı (62 kılo), Evgenıı Estafev (85 kılo) jáne Ibragım Bersanov (+105 kılo) júldegerler qataryna qosyldy. 

2015 jyly Taılandtyń Phý­het qala­synda jerlesterimiz qaı­ta ekinshi orynǵa kóte­rildi. Baıraqty básekede 3 altyn men 3 qolany ıemdendik. Osy oraıda bir qýana­tyn jaǵdaı, jeńis tuǵyryna kóterilgen úsh zil­temir­shilerimizdiń barlyǵy da óz qandas­tarymyz. Atap aıtsaq, Aıdar Qazov (77 kılo), Ermek О́mirtaı (85 kılo) jáne Rústem Sybaı (94 kılo) qarsylas shaq keltirmese, Ásem Sadyqova (58 kılo), Faına Sybanbaeva (63 kılo) jáne Maıra Faızollaeva (69 kılo) úz­dik úshtikti qorytyndylady. Ko­mandalyq esepte birinshi oryndy Qytaı (6+1+3) jáne úshinshi oryndy Fılıppın (2+0+0) ıe­len­di. 

2016 jyly Tashkentte Qytaı (5+4+3) kósh bastasa, ekinshi jáne úshinshi satyǵa Taıpeı (2+1+1) men Qazaqstan (2+0+0) turaqtady. Otandastarymyzdyń arasynan Denıs Ýlanov (85 kılo) pen Vladımır Sedov (94 kılo) altyn tuǵyrdan qol bulǵady. 

2017 jyly Túrikmenstannyń bas shahary – Ashhabadta jalaýy jelbiregen jarysta bir ǵana altyny bar Qazaqstan quramasy jetinshi orynda qalyp qoıdy. Bizdiń saıypqyrandar arasynan tek Albert Lınderdiń (69 kılo) ǵana juldyzy jarqyrady. Al jalpy komandalyq esepte Qytaı (8+2+2) aıqyn jeńiske qol jetkizdi. Odan keıingi satylarǵa Soltústik Koreıa (2+2+1) men О́zbekstan (2+0+1) jaıǵasty. 

2019 jylǵy Azııa chempıonatyna Qazaqstan quramasy kil myqtylardy apardy. Kezinde Olımpııa oıyndary men álem chempıonattarynda atoı salǵan sańlaqtardyń barlyǵy da Qy­taıda óner kórsetti. Biraq solar­dyń eshqaısysy babynda bolmaı shyqty. Osy kúnge deıingi resmı dodalardyń barlyǵynda únemi jeńis tuǵyrynyń eń bıik satysyna kóterilgen Ilıa Ilın besinshi orynda qalyp qoıǵanda, shynaıy jankúıerlerdiń qandaı kúı keshkenin qur sózben aıtyp jetkizý qıyn...

Kezinde Azııa chempıony­ ata­nýǵa kúsh-jigeri jetken Rýstem Sy­­baıdyń jeti sportshy arasynan jetinshi satyǵa jaıǵasqanyn es­tigen sátte jaǵamyzdy ustadyq... Sol sekildi talaı uly dúrmekterde ysylyp, ataqtary alysqa ja­ıyl­ǵan Zúlfııa Chınshanlo, Far­had Harkı, Karına Gorıcheva, Aleksandr Zaıchıkovtyń ózderi ózge eldiń órenderine jarytyp qarsylyq kórsete almaǵanyn kór­gende kóńilimiz qatty qula­zy­dy. Al Olımpıada chempıony Nı­jat Ra­­hımov óziniń alǵashqy múm­kin­digin paıdalana almaǵannan keıin jarysty jalǵastyrýdan bas tart­ty. Nátıjesinde Qazaqstan qu­ra­masy sary qurlyqtyń bas­ty do­da­synda úsh qola medaldy ıe­le­nýmen ǵana shekteldi. Bul júl­de­lerdiń ıegerleri – Arlı Chonteı (55 kılo), Denıs Ýlanov (81 kılo) já­ne Raýshan Meshithanova (81 kı­lo). 

Joǵaryda aıtylǵan jaısyz jaǵdaı el sporty basshylary jáne respýblıkalyq aýyr atletıka federasııasynyń tizginin ustaǵan azamattarǵa úlken oı sa­­lýǵa tıis. «Osy tyǵyryqtan qa­laı shyǵamyz?», «Burynǵy deń­geıimizge qaıta kóterilý úshin ne isteý kerek?», «Árbir ja­ýap­ty jarystar qarsańynda zil­temir­shilerdi qalaı jigerlen­diremiz?» degen sansyz saýaldarǵa dereý jaýap tabý qajet. Al eger eshteńe ózgermeı, «baıaǵy jartas – bir jartas» kúıinde qala beretin bolsa, onda aldaǵy dúbirli dodalarda da jer sıpap qalatynymyz aıdan anyq.