«Aq jol» demokratııalyq partııasynan prezıdenttikke kandıdat Danııa Espaeva úgit-nasıhat jumystarynyń aıasyndaǵy kezekti saparyn Qostanaı oblysyna jasady. Kandıdatpen qatar nasıhatshylar tobynda respýblıkalyq shtab músheleri – partııa tóraǵasynyń orynbasary Dmıtrıı Vasılev, Parlament Májilisiniń depýtaty Erlan Barlybaev jáne «Aq jol» partııasynyń aımaqtyq belsendileri boldy.
D.Espaeva bastaǵan delegasııa aldymen Altynsarın aýdanyna taban tiredi. «Olja-Belıavka» – aýdandaǵy iri seriktestikterdiń biri. Mamyr aıy – qostanaılyq dıqandar úshin qyzý naýqan kezi. Egistiktiń jalpy aýdany 145 myń gektar, onyń ishinde 111 myńy egis alqaby bolsa, 34 myńy – jaıylym. 2019 jylǵy egis alaby 66 myń gektardy quraıdy. Seriktestikte 600-ge tarta jumysker qyzmet etedi. Danııa Espaeva mehanızator, prorab, motorıstermen mashıno-traktor sheberhanasynda sóılesip, aýyl azamattaryn qandaı másele mazalaıtynyn bildi. «Mundaı kezdesýlerdiń orny bólek. Búgingi tańda Qazaqstan halqynyń 43 paıyzy aýyldyq jerde turady. Maǵan kandıdat retinde sizderge aýyl sharýashylyǵyn damytý jónindegi ustanymymdy jetkizý mańyzdy boldy. Sebebi aýyldaǵylardyń eńbegi qarjylaı laıyqty baǵalanyp, fermerlik sharýashylyqtaǵy jumyskerler qalalyq kásiporyndardan az jalaqy almaýy tıis. Osylaı ǵana biz ómir súrý kórsetkishin kóterip, jastardy syrt jaqqa emes, óz aýyldarynda eńbek etýge qyzyqtyra alamyz», dedi partııa kandıdaty.
Budan keıin kezdesý Selantev orta mektebinde jalǵasty. Onda kóbine aýyl ınfraqurylymyn jaqsartý týraly talqylandy. О́ńirdi aralaý munymen shektelmeı, kandıdat «Saryarqa AvtoProm» jáne «Agromashholdıng» kásiporyndaryna da baryp, saılaýshylarǵa saılaýaldy baǵdarlamasyn keńinen tanystyrdy. Sońynda Qostanaı qalasyndaǵy M.Gorkıı atyndaǵy mektep-gımnazııaǵa soqty.
* * *
«Aýyl» halyqtyq-demokratııalyq patrıottyq partııasynan kandıdat Tóleýtaı Rahymbekovtiń saılaýaldy baǵdarlamasy Qyzylordadaǵy Qazaq kúrish ǵylymı-zertteý ınstıtýtynda qyzý talqylandy. Ásirese agrarlyq ǵylymdy damytý, seleksııalyq ortalyqtardy qoldaý jáne zamanaýı jabdyqtarmen qamtamasyz etý máseleleri óte ózekti ekeni atalyp ótti. Atalǵan ınstıtýttyń dırektory mindetin atqarýshy Baqytjan Dúısenbekov bul baǵdarlamanyń kóńilden shyqqanyn aıtyp, Elbasynyń «Aýyl sharýashylyǵy – bizdiń ekonomıkamyzdyń draıveri» degen sózin eske saldy.
Al kandıdattyń Batys Qazaqstan oblysyndaǵy senim bildirilgen adamdary «KazConstruction Group» ujymymen kezdesti. Onda Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń dosenti, aýyl sharýashylyǵy ǵylymdarynyń kandıdaty Bolatqalı Tólebaev prezıdenttikke kandıdattyń basty ustanymdary týraly onyń áleýmettik jelilerdegi jeke paraqshalary jáne saıty arqyly ár saılaýshynyń tanysýǵa múmkindikteri zor ekenin aıtty. Onda kandıdat agrarlyq sala, turǵyn úı-kommýnaldyq sharýashylyǵy, ekologııa, jalpy el ekonomıkasynyń qazirgi jaǵdaıyn, problemalaryn jáne olardy sheshýdiń naqty joldary týraly oı bólisken.
Sondaı-aq úgit-nasıhat naýqanynyń aıasynda óńirlerde «О́z talyńdy otyrǵyz!» atty ekologııalyq aksııalar uıymdastyryldy. Elimizdiń túkpir-túkpirinde belsendi jastar aǵash egip, qala kóshelerin jasyl jelekke bóledi. Atap aıtsaq, Túrkistan, Shymkent, Qostanaı, Taldyqorǵan qalalarynda ótken qoǵamdyq jumysqa jastar bilek sybana kiristi. Sharaǵa qatysýshylar óz shaharlaryn kógaldandyrýmen qatar, saıabaqtar men qoǵamdyq oryndardy tazalady. Aksııa barysynda «Aýyl» partııasy atynan saıası naýqanǵa qatysatyn kandıdattyń baǵdarlamasy tanystyryldy.
* * *
Kásipodaqtar federasııasynan prezıdenttikke kandıdat retinde usynylǵan Amangeldi Taspıhovtyń aımaqtardaǵy qoǵamdyq shtabtary belsendi jumys istep jatyr. Mańǵystaý oblysyndaǵy qoǵamdyq shtabtyń jetekshisi Kıikbaı Jaýlın men kásipodaq ardageri Marat Dáýletov «CaspiBitum» kásipornynyń eńbek ujymymen jıyn ótkizdi. Onda kandıdattyń senim bildirgen adamdary A.Taspıhovtyń saılaýaldy tuǵyrnamasyn jáne ómirbaıanyn tanystyrdy. Ásirese jumys ornyndaǵy eńbek qaýipsizdigi jáne eńbekti qorǵaý týraly bólimin keńinen qozǵap, jınalǵandardyń birqatar suraǵyna jaýap berdi.
Al Batys Qazaqstan oblystyq bilim jáne ǵylym qyzmetkerleri kásipodaǵy Qazaqstan halqy Assambleıasy úıinde «Búgingi kásipodaqqa – belsendi jastar» atty semınar-trenıng ótkizdi. Is-sharada kásipodaqtyń belsendi jastaryn marapattap, artynan prezıdenttikten úmitker A.Taspıhovtyń saılaýaldy tuǵyrnamasy týraly baıandaldy. Onda jastar elimizdiń qozǵaýshy kúshi retinde baǵalanyp, olardy daýys berý naýqanynan qalys qalmaýǵa shaqyrdy.
Kandıdattyń Qyzylorda oblysy boıynsha óńirlik shtabynyń basshysy, aýmaqtyq kásipodaqtar birlestiginiń tóraǵasy Serik Sermaǵambetov oblystyq tarıhı ólketaný mýzeıi eńbek ujymymen kezdesti. Jıynda senim bildirilgen ókil kópshilikke A.Taspıhovtyń tulǵasyn jan-jaqty tanystyryp, tarıhı mańyzdy saıası naýqanmen tustas kelgen 18 mamyr – Halyqaralyq mýzeı kúnimen quttyqtady.
Sondaı-aq Túrkistan oblysy jáne Shymkent qalasyndaǵy qoǵamdyq shtab basshysynyń orynbasary Serik Áýeshanov bastaǵan top «PetroKazahstan Oıl prodakts» kásipornynda boldy. Onda kandıdattyń saılaýaldy baǵdarlamasynan úzindi oqylyp, bul jolǵy saıası dodanyń erekshelikteri talqylandy.
* * *
Elordada Qazaqstan Kommýnıstik halyq partııasynan kandıdat Jambyl Ahmetbekovti qoldaýǵa arnalǵan avtosherý ótti. Oǵan prezıdenttikten úmitker Jambyl Ahmetbekov pen respýblıkalyq saılaýaldy shtabtyń jetekshisi Aıqyn Qońyrov qatysty. 30 kólikten quralǵan shep QKHP respýblıkalyq shtabynan bastaý alyp, halyq kóp shoǵyrlanǵan jerlermen júrip ótti. Kommýnıstik nyshandarmen jáne qyzyl týmen bezendirilgen kólikter tizbegi jolaı kezdesken kólik júrgizýshileri men qala tuǵyndarynyń nazaryn erekshe aýdardy.
«Bul is-shara kommýnıster erekshe qadirleıtin Pıonerler kúni qarsańynda ótti jáne osy merekeniń qurmetine arnaldy. Bul kúnniń kommýnıster úshin mańyzy zor. Sondyqtan biz Pıonerler kúnin avtosherýmen atap ótýdi jón kórdik. Avtosherý qalanyń negizgi kóshelerinen ótti. Osylaısha biz óz jumysymyzǵa qala turǵyndarynyń nazaryn aýdarttyq. Shara sheńberinde qalyń kópshilikke partııanyń saılaýaldy baǵdarlamasy túsindirilip, úgit paraqtary taratyldy. Bizdiń partııa eńbek adamynyń múddesin qorǵaıdy. Biz – halyq jaqtaýshylarynyń partııasy, 15 jyldan asa ýaqyt birneshe mańyzdy baǵyttarda jumys istep kelemiz. Biz Qazaqstannyń kóptegen saılaýshylary bizdiń ekonomıkadaǵy, áleýmettik-saıası ómirdegi ustanymymyzdy qoldaıtynyna senemiz», dedi J.Ahmetbekov.
Nur Otan partııasynan prezıdenttikke kandıdat Qasym-Jomart Toqaevtyń respýblıkalyq qoǵamdyq shtabynyń músheleri Qostanaı oblysyna atbasyn burdy. Bul óńir bitik eginimen birge iri óndiris oryndarymen de belgili. Solardyń biri – «Sokolov-Sarybaı» taý-ken baıytý óndiristik birlestigi. Nasıhatshy top kásiporynnyń eńbek ujymymen kezdesip, Q.Toqaevtyń saılaýaldy baǵdarlamasynyń máni men mańyzy týraly aıtty. Atap aıtqanda, olar kandıdattyń baǵdarlamasy sabaqtastyq, ádildik jáne órleý degen qaǵıdalarǵa negizdelgeni, sol arqyly Elbasy jolyn jalǵastyrýdy, barshaǵa birdeı teń múmkindik jasaýdy jáne qarqyndy damýdy maqsat tutyp otyrǵany sóz boldy.
Sonymen qatar shtab ókilderi «Baıan sulý» kondıterlik fabrıkasynyń eńbek ujymymen kezdesti. Onda otandyq óndiris pen shaǵyn jáne orta bıznesti damytý Q.Toqaevtyń basty ustanymy ekeni aıtyldy. «Otandyq iri kásiporyndar men shaǵyn jáne orta bıznesti qoldaý – kandıdatymyzdyń basym baǵyttarynyń biri. Onyń barlyq strategııalyq maqsattarynyń sapaly ári ýaqtyly júzege asyrylýy úshin bizdiń partııa bar kúsh-jigerin jumsaıdy», dedi Máýlen Áshimbaev.
Jalpy bes kúnde shtab músheleri myńdaǵan shaqyrym jol júrip, Qaraǵandy, Pavlodar, Aqmola, Soltústik Qazaqstan jáne Qostanaı oblystarynda boldy. Partııalyqtar 12 qala jáne onshaqty eldi mekendi aralady. 32 aýqymdy is-shara ótti. Aýqymdy sharaǵa 14 myńnan asa saılaýshy qatysyp, Qasym-Jomart Toqaevtyń kandıdatýrasyn qyzý qoldady.
* * *
«Ult taǵdyry» ulttyq-patrıottyq qozǵalysynan kandıdat retinde tirkelgen Ámirjan Qosanov Almaty qalasynda turǵyndarmen jáne qalalyq shtab belsendilerimen kezdesti. Basqosýdy Almaty qalasynyń saılaýaldy shtaby uıymdastyryp, respýblıkalyq shtab jetekshisi Dáýren Babamuratov júrgizdi. Is-sharada kandıdat saılaýaldy tuǵyrnamasyn tanystyryp, túrli ózekti qoǵamdyq máselelerge qatysty óz ustanymyn jetkizdi. Qatysýshy turǵyndar ózderin tolǵandyrǵan saýaldaryn qoıyp, úmitkerge tilekteri men qoldaýyn bildirdi.
Sondaı-aq úgit-nasıhat jumystary О́skemen qalasynda jalǵasyn taýyp, aımaqtaǵy qoǵamdyq shtab belsendileri oblys ortalyǵynyń damyp kele jatqan bir aýdanynda «Qalany kógaldandyrý» is-sharasyn uıymdastyrdy. Atalǵan aksııa barysynda qala turǵyndary arasynda saılaý aldyndaǵy úgit-nasıhaty júrgizilip, jańa aýdanda aǵashtar otyrǵyzyldy. Sonymen qatar keıbir turǵyndar kandıdattyń saılaýaldy tuǵyrnamasynyń baǵyttarymen tanysyp, shtab belsendileriniń qalany kógaldandyrýǵa arnalǵan baǵyttaryn quptady.
Buǵan qosa 17 mamyr kúni saǵat 16.00-de prezıdentikke kandıdat Á.Qosanov taǵy da áleýmettik jelilerde tikeleı efırge shyqty. Jarty saǵatqa sozylǵan translıasııalar Instagram, Facebook jáne YouTube jelilerinde ótti. Kandıdat óziniń saılaýaldy tuǵyrnamasynda kórinis tapqan «Saıası bostandyqtar» taqyrybyn egjeı-tegjeıli ashty. Habar taratý orys tilinde sóıleıtin aýdıtorııaǵa arnaldy. О́tken efırde bul taqyryp boıynsha ol qazaq tildi aýdıtorııa úshin sóz sóılegen edi. Kandıdat kórermenderdiń saıası-áleýmettik suraqtaryna jaýap berip, olar ataǵan máseleler týraly pikir bildirdi. Endi kelesi efır shamamen 20 mamyrda saǵat 16.00-de ótkiziledi dep josparlanyp otyr.
* * *
«Uly dala qyrandary» respýblıkalyq qozǵalysynan prezıdenttikke kandıdat Sádibek Túgel Býrabaı aýdanynda ornalasqan Kenesary úńgirine bardy. «Kenesary han – qazaq tarıhynda sońǵy han ǵana emes, ult azattyǵy jolynda qaıtpas qaısarlyǵy men órshil rýhymen halyq júreginen oıyp oryn alǵan tulǵa. Myna úńgirden aınala alaqandaǵydaı kórinip tur. Jergilikti kónekóz qarııalardan bizge jetken áńgimelerde otarlaý saıasatyna qarsy shyqqan batyr senimdi serikterimen osynda jınalyp, aldaǵy áskerı mańyzdy josparlaryn aıtyp aqyldasqan eken. Búgin Kenesarydaı ataqty, erligi ańyz, órligi ónege bolǵan hannyń úńgirine sizderdi alyp kelip, ózim aldaǵy mańyzdy kezeńniń aldynda turyp, batyrdyń rýhy aldynda bas ıip, quran baǵyshtasaq dep oılap edim», dedi ol ózimen birge júrgen saılaýaldy shtabyndaǵy ókilderine.
Odan keıin elordaǵa oralyp, «Ulttyq qundylyqtardy ulyqtaıyq!» atty dóńgelek ústel jıynyn ótkizdi. Otyrysta S.Túgel saılaýaldy baǵdarlamasynda memlekettik tildiń mártebesin kóterý, ulttyq salt-dástúrdi, ulttyq at sporty oıyndaryn damytý, jemqorlyqqa tosqaýyl, demografııa máselesine zor kóńil bólý baǵyttary kórsetilgenin, munyń barlyǵy jas urpaq tárbıesinde ózekti ekenin aıtty.
«Biz jas urpaqty ulttyq múddeni qorǵaýǵa baǵyttaýymyz úshin olardyń boıyna eń aldymen ádildikti ornyqtyrýymyz qajet. О́zim jyldar boıy Joǵarǵy sotta sýdıa bolyp qyzmet atqarǵandyqtan, jas býyn qoǵamdy ishinen jegideı jeıtin jemqorlyqtan boılaryn aýlaq salyp, izgilik pen adamgershilikti basty ustanym etip ósse dep oılaımyn. S.Túgeldiń buǵan deıin de atqarǵan jumystarynyń basy-qasynda júrdim, bul joly da bastamasyn qoldaımyn», dedi kandıdattyń senim bildirilgen adamy, sot salasynyń eńbek sińirgen qyzmetkeri Talǵat Omar.
