Armenııa Prezıdenti Qazaqstannyń Tuńǵysh Prezıdenti Nursultan Nazarbaevtyń basshylyǵymen qol jetkizgen jetistikterin joǵary baǵalap, «mańyzdy sheshimder qabyldaýdaǵy Elbasynyń danalyǵy men óz halqyn alǵa bastaýdaǵy qarqyndy isterin» atap ótti.
D.Nazarbaeva Astana ekonomıkalyq forýmyna belsendi qatysqany jáne Eýrazııalyq medıa forýmǵa turaqty qoldaý kórsetkeni úshin A.Sarkısıanǵa alǵys bildirdi. «Eýrazııalyq medıa forýmǵa sizderdiń qatysýyńyz barshaǵa ortaq tosyn syı bolady. Siz «medıa forýmnyń ákesi» bolyp tabylasyz jáne medıa qoǵamdastyǵynyń batys bóligi arasynda ony ilgeriletý úshin kóptegen is atqardyńyz» dedi Parlamenttiń joǵarǵy Palatasynyń basshysy.
Armenııa Prezıdenti óz elindegi ishki saıası jaǵdaı týraly Senat basshysyna aıtyp berip, qazirgi kúrdeli máselelerdi eńserý jáne damýdyń jańa jolyna shyǵýda Armenııa halqynyń múmkindigi jetkilikti ekenin atap ótti.
Senat Tóraǵasy Armenııa tranzıt kezeńin eńseretinine senim bildirdi jáne eldegi mańyzdy saıası oqıǵalar týraly A.Sarkısıandy habardar etip, Qazaqstan halqy bolashaqqa zor senimmen qaraıtynyn atap ótti. «Beıbitshilik pen turaqtylyqty saqtaý jáne Elbasynyń strategııalyq baǵytyn jalǵastyrý – basty mindet», - dedi Senat basshysy.
Senat Tóraǵasy Armenııanyń Ulttyq Jınalysymen yntymaqtastyqty odan ári damytýǵa múddelilik bildirdi. D.Nazarbaevanyń pikirinshe, zań shyǵarý qyzmeti boıynsha tájirıbe almasý úshin jáne ekijaqty qarym-qatynastardy keńeıtý joldary týraly pikirlesý arqyly parlamenttik dostyq toptarynyń áleýetin belsendi paıdalaný qajet.
Taraptar yntymaqtastyqtyń keleshegi zor salalaryn talqylady. Armenııa Prezıdenti Erevannyń jasandy ıntellekt pen IT tehnologııalardy damytý, tamaq qaýipsizdigin qamtamasyz etýdegi tájirıbesimen bólisýge daıyn ekenin atap ótti.
Senat Tóraǵasy sheteldegi armıan dıasporasyn QHR, Reseı jáne basqa da elimizben shektesetin úshinshi memlekettermen saýda jasaýdaǵy artyqshylyqtardy paıdalanyp, Qazaqstanǵa ınvestısııa salýǵa shaqyrdy.
