Saıasat • 20 Mamyr, 2019

Qasym-Jomart Toqaevtyń tóraǵalyǵymen sybaılas jemqorlyqqa qarsy is-qımyl máseleleri jóninde keńes ótti

1203 ret kórsetildi

Bul týraly Aqordanyń baspasóz qyzmeti habarlady.

Memleket basshysy elimizde jemqorlyqtyń dendep ketkenine alańdaýshylyq bildirip, bunyń qoǵamǵa qaýipti dert ekenin aıtty.

– Jyl saıyn Qazaqstanda ortasha eseppen 2 myńnan astam sybaılas jemqorlyqqa qatysty qylmystyq is tirkeledi. Myńnan asa adam jaýapqa tartylady. Bul – batpandap kirip, mysqaldap shyǵatyn kesel. Osy aýrýdy qazir shuǵyl túrde emdemesek, erteń kesh bolýy múmkin, – dedi Qazaqstan Prezıdenti.

Qasym-Jomart Toqaev jemqorlyqtyń ulttyq qaýipsizdik pen memlekettiń bolashaǵyna nuqsan keltiretinin aıtty. Sondyqtan, onyń tamyryna balta shaýyp, túbegeıli joıý qajet. Bul dertpen bir jeńnen qol, bir jaǵadan bas shyǵaryp, birlesip kúresýge shaqyrdy.  Memlekette oǵan qajettiniń bári bar ekenin atap ótti.

– Birinshiden, bizde jemqorlyqqa qarsy kúreste qarý bola alatyn myqty memlekettik ınstıtýttar bar. Memlekettik apparat jumys isteý tásilin ózgertip, jemqorlyqtyń jolyn kesýi kerek. Ekinshiden, jemqorlyqpen kúres halyqtyń tabandy suranysyna ıe. Ákimshilik saýalnama júrgizedi, ózim de el aralap júremin. Sonda baıqaǵanym, bizdiń qoǵam jemqorlyqpen ymyrasyz kúresýge daıyn. Úshinshiden, bizdiń eldi damytýǵa jáne halyqtyń ál-aýqatyn arttyrýǵa baǵyttalǵan josparlarymyz jemqorlyqty túbegeıli joıǵan jaǵdaıda ǵana júzege aspaq, – dedi Qasym-Jomart Toqaev. 

Memleket basshysy sońǵy úsh jylda 900-den astam adamnyń jemqorlyqpen ustalǵanyn, memlekettik baǵdarlamalardyń sapaly oryndalýyna osyndaı oqıǵalardyń kedergi keltiretinin jetkizdi. 

– Biz ekonomıkany jańǵyrtýǵa, aýqymdy áleýmettik baǵdarlamalardy júzege asyrýǵa qazynadan qyrýar qarjy bólemiz. Alaıda, jemqorlyqtyń saldarynan memlekettik baǵdarlamalar sapasyz oryndalýda. Bul halyqty áleýmettik qorǵaý, aýyz sýmen qamtamasyz etý máseleleriniń ýaqtyly sheshilmegenin kórsetedi. Jergilikti joldardyń sapasyzdyǵy men bıznestiń damýyna jemqorlyqtyń kesirinen týyndaǵan problemalar kedergi keltiredi. Azamattar bıýdjettiń árbir teńgesiniń maqsatty jumsalatynyna kóz jetkizýi kerek, – dedi Qazaqstan Prezıdenti.

Qasym-Jomart Toqaev bıliktiń jemqorlyqqa qarsy is-qımyl josparynyń jeti negizgi sharasyn atap ótti.

– Birinshi – azamattardyń quqyǵyn qorǵaý. Men Konstıtýsııaǵa sáıkes ultyna, dinine, múlik jaǵdaıyna qaramastan barlyq azamattar teń degen erejeni basshylyqqa alamyn. Eshkim de zańnan bıik emes. Qol astyndaǵy qyzmetkerlerdiń jemqorlyqqa qatysy bolsa, ortalyqta da, óńirlerde de birinshi basshylar tikeleı jaýap beredi. Sondyqtan, keshendi aldyn alý sharalaryn qolǵa alý qajet, – dedi Memleket basshysy.

Qasym-Jomart Toqaev ekinshi shara retinde memleket pen azamattyq qoǵam ınstıtýttarynyń konstrýktıvti áriptestigin atap, jemqorlyqpen kúreste kúshtik sharalar azdyq etetin aıtty.

– Qoǵamda jemqorlyqqa múldem tózbeýshilik qalyptasýy shart. Barlyq memlekettik organdar osy baǵytta jumys isteýi kerek. Ádilet mınıstrligine kópshiliktiń jemqorlyqqa qatysty quqyqtyq saýatyn arttyrý jumystaryn kúsheıtýdi tapsyramyn. Bilim jáne ǵylym mınıstrligi de balalardy erte jastan jemqorlyqqa qarsy mádenıet negizderine baýlýdy qol alǵany jón, – dedi Qazaqstan Prezıdenti.

Úshinshi – qoǵamdyq baqylaýdy kúsheıtý.

– Parlamenttiń, qoǵamdyq jáne úkimettik emes uıymdardyń, buqaralyq aqparat quraldarynyń belsendi qatysýy negizinde memlekettik sheshimderdiń ádildigin qamtamasyz etý kerek. Jer ýchaskelerin berý, balabaqshadan kezek alý sııaqty máselelerdiń bári de qoǵamdyq baqylaý negizinde júzege asýy shart. Bizde mundaı jumystar úshin quqyqtyq mehanızmder bar. Árbir memlekettik organda qoǵamdyq keńes jumys isteıdi. Alaıda, is júzinde olardyń jumysy kóńil kónshitpeı otyr. Azamattyq qoǵammen jumys isteý tásilderin túbegeıli ózgertý qajet. Memlekettik apparattyń jumysyn azamattardyń talabyna saı baǵyttaý kerek, – dedi Memleket basshysy.  

Tórtinshi shara – bıýdjettik saıasattyń ashyqtyǵy.

– Bıýdjettik úderistiń kezeńderi ıaǵnı, qurylýdan bastap júzege asýǵa deıingi aralyqtyń barlyǵy ashyq bolýy kerek. Azamattar qajet etpeıtin taýarlar alynyp, ǵımarattar salynyp jatatyn mysaldar az emes. Tıimsiz «ımıdjdik» jobalar men baǵdarlamalardan bas tartý qajet. Dańǵoılyq pen ysyrapshyldyqqa jol bergen sheneýnikter qatań jazalanýy kerek. Halyqtyń qarjysy tıimsiz jumsalsa, quqyq buzýshylyqqa jol berilse, onyń jazasy aýyr bolady. Memlekettik organdar janyndaǵy uıymdar men ulttyq kompanııalar da qoǵam baqylaýynda ashyq ári túsinikti bolýy kerek, – dedi Qasym-Jomart Toqaev.

Qazaqstan Prezıdenti besinshi kezekte jemqorlyqqa qarsy saıasatta óńirlerdiń rólin kúsheıtý qajettigin atap ótti.

– Ákimderge aıtarym, jemqorlyqty túbegeıli joıý - sizderdiń jumystaryńyzdyń negizgi kórsetkishiniń biri. Oǵan sizder tikeleı jaýaptysyzdar. Árbir eldi mekenniń óz bıýdjetine qaraı tórtinshi deńgeıli bıýdjet qurýdy aıaqtaý kerek. Meniń Prezıdent retindegi ustanymym bıýdjet shyǵyndaryn josparlaýǵa, ásirese óńirlerde halyq ókilderin qatystyrý kerek. Budan el ekonomıkasy damyp, tıisinshe, halyqtyń ál-aýqaty artady, – dedi Memleket basshysy.

Altynshy – memlekettik qyzmet kórsetý isindegi údemeli sıfrlandyrý.

– Memlekettik apparat qyzmet kórsetý barysynda tutynýshylarǵa beıimdelý qajet. Turmystyq jemqorlyqty joıýdyń birden bir kózi – memlekettik qyzmet kórsetýdi elektrondy nusqaǵa kóshirý. Bul jerde sheshimin tappaǵan máseleler bar. Búginde málimetter bazasynyń 33 paıyzy ǵana ıntegrasııalanǵan. Sıfrlyq damý, qorǵanys jáne aeroǵarysh ónerkásibi mınıstrligi osy jumysty sapaly ári ýaqtyly aıaqtaýy qajet. Elektrondy Úkimetti damytý aıasynda azamattardyń kórsetiletin memlekettik qyzmetterdi mobıldi nusqada alýy úshin jappaı oqytý jumystaryn damytý bizdiń basymdyǵymyz sanalady, – dedi Qasym-Jomart Toqaev.  

Jetinshi mindet – memlekettik satyp alý júıelerin jetildirip, bızneske ákimshilik qysymdy tómendetý.

– Búginde 25 myń uıym memlekettik satyp alýlardy júzege asyrady. Bul jemqorlyqqa qarsy baqylaýdy qıyndatady. Osyǵan baılanysty, memlekettik satyp alýlardy ortalyqtandyryp, áleýmettik saladaǵy bıýdjettik mekeme basshylaryn bul mindetten bosatý kerek. Kolledjder men mektep dırektoryna deıin memlekettik satyp alýǵa qatysy bar. Ortalyq memlekettik organdarda saıası qyzmetshilerdi memlekettik satyp alýlarǵa aralastyrmaıtyn mehanızmder ázirleýdi tapsyramyn. Sonymen qatar memlekettik fýnksııalardy básekelestik ortaǵa berý kerek. Bul týraly jıi aıtylsa da, 5 fýnksııa ǵana jeke sektorǵa berilgen. Premer-Mınıstrdiń birinshi orynbasary Á.Smaıylovqa jáne Ulttyq ekonomıka mınıstrine tıisti jumystardy júrgizýdi tapsyramyn. Onyń nátıjelerin maǵan 1 aıdyń ishinde baıandańyzdar, – dedi Qazaqstan Prezıdenti.

Jıyn sońynda Memleket basshysy jemqorlyq boıynsha qol astyndaǵy qyzmetkerlerdiń qylmystyq áreketteri úshin birinshi basshylardyń jaýapty bolatynyn taǵy bir márte qadap aıtty.

– Eger biz jemqorlyqty túbegeıli joıýdy mindet etip alsaq, menińshe, memlekettik organ basshylary mundaı jaǵdaıda otstavkaǵa ketýi kerek. Olardyń otstavkaǵa ketýin qabyldaýdy nemese qabyldamaýdy Memleket basshysy sheshedi. Biraq jumystan bosatý týraly aryz jazýy mindetti shara bolýy kerek, – dedi Qasym-Jomart Toqaev.

 Úkimet pen Prezıdent Ákimshiligine osy jıynda kóterilgen máselelerdi sheshý úshin engizilgen usynystar negizinde jumys isteý tapsyryldy.   

Sońǵy jańalyqtar

Almatydaǵy qurylys bazarynda órt shyqty

Aımaqtar • Búgin, 14:37

Almaty mańynda jer silkinisi boldy

Aımaqtar • Búgin, 12:57

Búgin - Ulttyq dombyra kúni

Qazaqstan • Búgin, 08:50

Uqsas jańalyqtar