Aımaqtar • 22 Mamyr, 2019

Qaraǵandylyq Aısha Ábenova álemniń kishkentaı arýy atandy

745 ret kórsetildi

Túrkııanyń Bodrým qalasynda ótken Little Miss World-2019 («Álemniń kishkentaı arýy») atty qyz balalar arasyndaǵy sulýlyq baıqaýynda qaraǵandylyq Aısha Ábenova bas júldeni jeńip aldy.

Kishkentaı arýlardyń bul saıysynda 7-12 jas aralyǵyndaǵy 30 úmitker baq synaǵan bolatyn. Mine, osy synda súrinbeı ótken Aısha «Álemniń kishkentaı arýy» ataǵynan basqa Best of the best («Úzdikterdiń úzdigi) jáne Miss Talent («Talantty arý») júldelerin de jeńip aldy.

Bodrým qalasyndaǵy baıqaýda Aısha qyz lezgınka bıimen kórermen qaýym men qazylar alqasyn tánti etken. Sonymen qatar, ol ulttyq kóılekke malynyp, týǵan eli – Qazaqstandy jurtshylyqqa óte áserli etip tanystyrǵan. Odan keıin Aısha qazaqtyń darhan da jomart kóńilin sahnada pash etip, konkýrsqa qatysýshylardyń bárine estelik syılyq tartý etipti.

– Aısha bizdiń úmitimizdi tolyǵymen aqtady. Aldaǵy ýaqytta onymen birigip, kóptegen jospar quramyz ba degen oıymyz bar, – deıdi Art Line modeldik agenttiginiń dırektory Mádına Ahmetbaeva.

Álemniń kishkentaı arýy atalǵan agenttikte 3 jyldan beri kásibı mamandardan dáris alyp keledi. Aısha Bodrýmdaǵy tabystan buryn da talaı baıqaýǵa qatysyp, mańdaıy jarqyrap júrgen talantty bala. Mysaly, ol 2017 jyly «Qaraǵandynyń kishkentaı arýy», odan keıin Mini Miss Grand Prix Russia-2018 ataqtaryn jeńip alǵan.

Qaraǵandy qalasynda dúnıege kelgen Aısha Ábenovanyń jasy aldaǵy aıdyń 13-i kúni segizge tolady. Ol qoly bos kezinde bımen aınalysyp, fortepıanoda oınaǵandy jaqsy kóredi. Kishkentaı arýdyń akterlyq qabileti de bar. Aısha astanamyzdyń 20 jyldyǵyna arnalǵan «О́mir tarıhy» atty derekti fılmge túsken.


Qaraǵandy oblysy

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar