– Bul bizdiń qala úshin óte mańyzdy oqıǵa. Memleket basshysy halyqtyń áleýmettik jaǵdaıynyń basty bir kórsetkishi bolyp tabylatyn medısınalyq qyzmet kórsetýdiń sapasyna zor kóńil bólip keledi, - dep atap ótti aımaq basshysy.
Aýrýhananyń bas dárigeri Banýrjan Jańǵalovtyń aıtýy boıynsha, bul kompıýterlik tomograf kórsetiliminiń aıqyndylyǵymen, tórt mártelik zertteý kólemin oryndaýymen jáne sáýle júktemesiniń azdyǵymen erekshelenedi. Kúnine 20-25 zertteý júrgizý josparlanyp otyr. Kabınet tańerteńgi saǵat 8.00-den keshki 20.00-ge deıin jumys isteıdi.
Joǵary sapaly tomograftyń qoldanylýy ınsýlt, tynys organdary aýrýlarynda, qaterli isiktiń paıda bolýynda, qan aınalymy júıesiniń buzylýynda, as qorytý organdary men aǵzanyń basqa da músheleriniń syrqatynda dıagnostıkany erte qoıý úshin asa mańyzdy. Kompıýterlik dıagnostıka tegin medısınalyq kómektiń kepildendirilgen kólemi aıasynda, sondaı-aq, aqyly negizde júzege asyrylatyn bolady. Baǵasy qajetti zertteýdiń túrine baılanysty 10 000 teńgeden 25 000 teńgege deıingi aralyqta.
Qalalyq kópbeıindi aýrýhananyń úsh qabatty ǵımaratynda 2018 jyly 55 mıllıon teńgeniń kúrdeli jóndeýi júrgizilgen bolatyn. Bıylǵy jyly jergilikti bıýdjettiń qarjysy esebinen 58,6 mıllıon teńgeniń qymbat turatyn rentgen qondyrǵysyn ornatý kózdelýde.
Aqmola oblysy boıynsha tutastaı alǵanda 2018 jylmen salystyrǵanda medısınalyq tehnıkamen jáne medısınalyq baǵyttaǵy buıymdarmen jaraqtandyrylý dınamıkasy 10 prosentke ósip otyr. 2019 jyly jergilikti bıýdjet esebinen densaýlyq saqtaý nysandaryn tehnıkalyq jaraqtandyrýǵa 1,5 mıllıard teńge qarastyrylǵan.
