– Medıasııa – Assambleıa aınalysatyn mańyzdy istiń biri. Medıator – táýelsiz tulǵa. Medıasııaǵa qatysýshy taraptar medıatordyń tájirıbesine, bilimi men iskerligine súıene otyryp, ózara tıimdi sheshimge óz betinshe keledi, – deıdi «Qoǵamdyq kelisim» KMM medıasııa kabınetiniń meńgerýshisi Sánııa Satalıeva.
Qazirgi tańda Qazaqstan halqy Assambleıasynyń janyndaǵy medıasııa kabıneti 3 respýbıkalyq jáne 1 jergilikti medıasııa ortalyqtarymen tyǵyz qarym-qatynasta jumys júrgizip otyr. Bul ortalyqtardyń kásibı medıatorlary men Qazaqstan halqy Assambleıasynyń qoǵamdyq medıatorlary tegin medıasııa rásimderin júrgizedi. Oblys turǵyndaryn aqparattandyrý maqsatynda telearnadan arnaıy «júgirtpe jol» berilip otyrady. О́z jumystaryn halyq jáne ujym arasyna «Ashyq esik kúnderi» qoǵamdyq qabyldaý, kóshpeli aqparat-nasıhattyq jumystary, medıatorlar otyrysy, semınar-trenıng jáne dóńgelek ústel formatynda júrgizetin medıatorlar aýdan, qalalardy aralap qyzmet etedi. Medıasııa baǵytyndaǵy jumystardy odan ári jandandyrý úshin Qazaqstan halqy Assambleıasynyń janynda qurylǵan kóshpeli aqparattyq-nasıhattyq toptar eldi mekenderdi aralap, sonyń ishinde Jańaózen qalasy, Quryq kenti, Mańǵystaý, Munaıly jáne Beıneý aýdandaryna issaparmen bardy.
Medıasııa kabınetine kelýshiler sanynyń kóbeıýi el arasynda medıasııaǵa degen qajettiliktiń bar ekendigin ańǵartady. Kelýshilerdiń sheshimin taba almaı júrgen negizgi máseleleri kredıttik uıymdarǵa, otbasy problemalaryna, saqtandyrý mekemelerine, eńbek daýlary men jalaqy tólemeýge, bilim berý jáne densaýlyq saqtaý mekemelerindegi keıbir máselelerge qatysty bolyp keledi. Medıasııa kabınetine 2016 jyly – 56 adam, 2017 jyly – 301, al 2018 jyly 443 adam kelgen.
– Qazir jasóspirimderdiń problemalary eresekterdiń alańdaýshylyǵyn týdyrady, sondaı-aq mektep oqýshylary arasynda janjaldar bolmaı turmaıdy. О́ńirlerdegi mektepter men kolledjderde oqıtyn jasóspirimder arasynda tártip buzýshylyq túrleriniń baıqalýyna baılanysty bilim berý uıymdarynyń jáne QHA medıasııa kabınetteri mamandarynyń birlesken medıasııa damytý jumystary uıymdastyrylýda, – deıdi Mańǵystaý oblysy Qazaqstan halqy Assambleıasy hatshylyǵynyń meńgerýshisi G.Ismýrzına.
Aldaǵy ýaqytta joba aıasynda kásibı medıatorlar ata-analarǵa, mektep psıhologtaryna, tárbıe isimen aınalysatyn mamandarǵa arnaıy semınarlar uıymdastyryp, daýlar men kıkiljińderdiń aldyn alý ádistemelerin túsindirýdi josparlaýda. Oqý oryndarynan bólek aýrýhanalar men emhanalarda, ózge de ujymdarda túsindirý, kıkiljińderdi boldyrmaý baǵytyndaǵy jumystar júrgizilýde.
Mańǵystaý oblysy
