Elimizde mundaı iri boks keshi ótetinin uıymdastyrýshylar Ortalyq kommýnıkasııalar qyzmetinde ótken baspasóz jıynynda málimdedi. Jıynǵa MTK Kazakhstan basshysy Asqar Salyqbaev, Taıaý Shyǵys jáne Azııa aımaǵy boıynsha MTK keńesshisi Ahmed Seddıkı, kásipqoı boksshylar Janqosh Turarov, Vıktor Kotochıgov jáne shetelden kelgen birneshe mártebeli meıman qatysty.
«6 shilde kúni elordada kásipqoı boks keshi ótkeli jatyr. Bul tarıhı sátterdiń biri bolǵaly tur. Sebebi bul keshte Janqosh Turarov sharshy alańǵa oralady. Janqosh sońǵy bir jarym jyl boıy aıqasqa shyqpaǵan edi. Taǵy bir aıta keterligi – bul keshke túbi marokkolyq fransýz boksshysy Nordın Oýbaalı shyqqaly otyr. Boks keshi «Barys-Arenada» ótedi. Bılet baǵasy 500-2000 teńge aralyǵynda bolady. Barynsha tanymal boksshylardy tartýǵa tyrysamyz», deıdi MTK Kazakhstan promoýterlik kompanııasynyń basshysy Asqar Salyqbaev.
Jýyrda ǵana MTK Kazakhstan promoýterlik kompanııasymen kelisimshartqa otyrǵan jerlesimiz Janqosh Turarov «Barys Arenada» qazaqstandyq jáne sheteldik boksshylardyń qatysýymen ótetin boks keshine bir jarym jyldyq úzilisten keıin rıngke shyǵatynyn málimdedi. Ol 2017 jyly 9 qyrkúıekte ótken sońǵy kezdesýinde qolynan jaraqat alyp, sharshy alańnan alystap qalǵan bolatyn.
«Sharshy alańǵa shyqpaǵanyma da bir jarym jyl ýaqyt bolyp qalypty. Dese de, jattyǵýdan qol úzgen joqpyn. Dál qazir ózimdi babymdamyn dep esepteımin. Alla qalasa, álemdik beldikterdi alamyz degen oıymyz bar. 6 shildedegi elordadaǵy jekpe-jekke deıin Anglııada reıtıngtik kezdesý ótkizemin. Daıyndyq óte tamasha», dedi Janqosh Turarov.
Atalǵan boks keshinde Turarovpen birge jeńil salmaqta WBC boıynsha álem chempıony tıtýlyn jáne tıisinshe orta salmaqtaǵy WBO boıynsha Eýropa chempıony tıtýlyn qorǵaıtyn Nordın Oýbaalı jáne Devıd Olıver Djoıs sııaqty halyqaralyq juldyzdar da óz jekpe-jekterin ótkizedi. Buǵan qosa atalmysh keshte qazaqstandyq boksshylardan Sultan Zaýyrbek, Vıktor Kotochıgov, Alı Baloev, Ábilqaıyr Shegalıev, Nurtas Ájbenov jáne Abaı Tólesh sekildi bylǵary qolǵap sheberleri jankúıerler aldynda óz ónerlerin kórsetedi.
Elordadaǵy álemdik boks keshin dúnıejúzi boıynsha eń iri sportyq oqıǵalardan habar taratýshy amerıkalyq ESPN+ telearnasy jekpe-jekterdi AQSh, Kanada jáne Pýerto-Rıkodaǵy 100 mıllıonnan astam kórermenge tikeleı efırde translıasııa jasaıdy. Sondaı-aq iFL TV ıýtýb jobasy da bul oqıǵanyń Eýropa jáne álemniń basqa da aımaǵyndaǵy boks kórermenderine translıasııa júrgizetin bolady.
Aıta keteıik, MTK Global – boks menedjmenti boıynsha álemdegi iri kompanııa sanalady. Shtab-páteri Dýbaıda ornalasqan. Bul promoýterlik kompanııany Gennadıı Golovkınniń eks-qarsylasy, Eýropanyń eki márte chempıony brıtanııalyq boksshy Metıý Maklın 2012 jylǵy qyrkúıekte qurǵan. MTK Global promoýterlik kompanııasy álem boıynsha kóptegen iri qalalarda boks keshterin uıymdastyryp keledi.
