Kezdesýge Parlament Májilisiniń depýtaty, «Vozrojdenıe» qazaqstandyq nemister qaýymdastyǵy Qamqorshylar keńesiniń tóraǵasy Albert Raý, Federaldy úkimettiń ókiletti hatshysy Sebastıan Klappert, Qazaqstandaǵy Germanııa elshiligi saıası bóliminiń jetekshisi Valentına Goldmann qatysty. Jıyn barysynda Qazaqstan halqy Assambleıasy Qonys aýdarýshylar men az ulttar jónindegi Federaldyq úkimet arasyndaǵy ózara baılanysty bekitý, qazaq elindegi etnostyq nemister men Germanııadaǵy qazaqtardy qoldaý boıynsha eki el arasyndaǵy yntymaqtastyqty nyǵaıtý jáne keńeıtýge qatysty máseleler men negizgi aspektiler talqylandy.
– Qazaqstan barlyq qarym-qatynas kesheni boıynsha Germanııamen yntymaqtastyqty damytýǵa basa mán beredi. Saıası dıalog ashyq jáne senimdi sıpatqa ıe. Germanııa Qazaqstannyń jetekshi ekonomıkalyq seriktesteriniń qataryna kiredi. Eki el arasyndaǵy saýda-ekonomıkalyq qatynastar ózara is-qımyldyń turaqty damýyna jáne jańa múmkindikterin izdeýge serpin beredi. Nemis ınvestısııasynyń shamamen 90 paıyzy Qazaqstan ekonomıkasynyń shıkizattyq emes sektoryna baǵyttalady. Qazaqstanda birlesken kásiporyndardy, nemis kompanııalary men bankterdiń ókildikterin qosa alǵanda, Germanııa kapıtalynyń qatysýymen 900-den asa ekonomıkalyq qurylym tirkelgen. 450-ge jýyq germanııalyq kásiporyn belsendi jumys isteıdi. Yntymaqtastyq óńdeýshi ónerkásip, qurylys, kólik jáne baılanys, aýyl sharýashylyǵy, áleýmettik jáne derbes qyzmetter jáne ekonomıkanyń basqa da salalarynda júzege asyrylady, – dedi Qazaqstan halqy Assambleıasy Tóraǵasynyń orynbasary Janseıit Túımebaev.
Sonymen qatar Janseıit Túımebaev meımandarǵa álemdik saıasatta balamasy joq biregeı qoǵamdyq kelisim ınstıtýty – Qazaqstan halqy Assambleıasynyń jumysymen jan-jaqty tanystyrdy. Onyń aıtýynsha, Qazaqstanda ulty nemis shamamen 180 myń azamat ómir súredi jáne Germanııaǵa 900 myńnan asa adam qonys aýdarǵan. Buǵan qosa Germanııada 300-ge jýyq qazaqstandyq bilim alyp jatyr. Bul – eki eldi baılanystyryp turǵan dáneker.
О́z kezeginde Qonys aýdarýshylar men az ulttardyń isteri jónindegi Federaldyq úkimettiń ókiletti ýákili Bernd Fabrısıýs Beıbitshilik pen kelisim saraıy ashyqtyq pen qonaqjaılylyqtyń sımvoly ekenin aıtyp, jyly qabyldaǵandaryna rızashylyǵyn bildirdi.
– Sizdiń ulttar dostyǵynyń uıytqysy bolyp otyrǵan Assambleıa týraly keńinen baıandaǵanyńyz óte mazmundy boldy. Qazaq halqyna osyndaǵy etnostyq nemisterge kórsetip otyrǵan baýyrmaldyǵy men úlken qoldaýy úshin Germanııa úkimetiniń atynan alǵysymdy bildiremin. Eki eldegi ómir súrip jatqan jáne qonys aýdarǵan aǵaıyn – qazaq-nemis dostyǵyn berik ustap turǵan senimdi kópir. Biz Qazaqstandy turaqtylyqtyń aıqyn úlgisi retinde bilemiz. Sol turaqtylyqtyń negizi ashyqtyq pen ekonomıkalyq damýǵa kórsetilgen qoldaýdy joǵary baǵalaımyz, – degen Bernd Fabrısıýs sóziniń sońynda Berlınge qonaqqa kelýge shaqyrdy.
Qazaqstandaǵy nemis dıasporasy múddelerin qoldaý maqsatynda Qazaqstan-Germanııa Úkimetaralyq komıssııasy qyzmet atqarady. 20 mamyr kúni Nur-Sultan qalasynda osy komıssııanyń 17-shi otyrysy ótti.
