Memleket basshysy Qasym-Jomart Toqaev Aqtóbege issapary kezinde medısına qaýymdastyǵymen kezdesti. Búgin Aqtóbedegi medısına ortalyǵynda Almaty deklarasııasynyń 40 jyldyǵy men Aqtóbe qalasynyń 150 jyldyǵyna oraı «Halyqtyń densaýlyǵyn saqtaý: saıasat, ǵylym, bilim, MSAK júıesindegi tájirıbe» taqyrybynda halyqaralyq-praktıkalyq konferensııa ótti. Jıynda Densaýlyq saqtaý mınıstri Eljan Birtanov medısınalyq kómektiń sapasyn arttyrý jolynda atqarylǵan negizgi is-sharalardy tanystyrdy.
Mınıstr densaýlyq saqtaý salasyndaǵy ózekti máselelerdi sheshý úshin Elbasynyń tapsyrmasymen 2016-2019 jyldarǵa arnalǵan memlekettik «Densaýlyq» baǵdarlamasy ázirlengenin aıtty. Qujatta emhana, jedel járdem men qabyldaý bólimindegi medısınalyq qyzmettiń sapasyn jaqsartý, maman tapshylyǵyn joıý, aýrýhana, emhanany jabdyqtaý syndy basty baǵyttar kórinis tapqan.
Eljan Birtanov keıbir máselege keńinen toqtaldy. MSAK (medısınalyq-sanıtarııalyq alǵashqy kómek) kelsek, búginde skrınıngtik baǵdarlamaǵa qatysqandar qatary eselep kóbeıgen. Infeksııalyq emes dertterdi basqarý baǵdarlamasy sátti júzege asýda, ol boıynsha 220 myń pasıent qamtyldy. Nátıjesinde syrqaty asqynyp, aýrýhanaǵa túskender sany 2,5 esege azaıdy.
MSAK arnalǵan 165 jańa nysan quryldy, 1 myńnan astam dárigerlik ýchaske ashylyp, medısınalyq-sanıtarlyq alǵashqy kómek kórsetetin dárigerdiń júktemesi jeńildedi. TMKKK (tegin medısınalyq kómektiń kepildendirilgen kólemi) aıasynda jan basyna shaqqandaǵy tarıftiń 20 paıyzǵa kóterilýi esebinen MSAK bólingen qarjy 40 paıyzǵa artty. MSAK sandyq júıege kóshken soń emhanalardaǵy kezek 2 esege azaıdy.
Jedel medısınalyq kómektiń sapasyn arttyrý maqsatynda jańa standarttar qabyldandy, avtokólikterdiń dızaıny ózgerdi jáne olar navıgasııalyq júıemen jabdyqtaldy. Nátıjesinde jedel járdem kóligi naýqas shaqyrǵan jerge 15 mınýtta jetedi. Al aýrýhanalardaǵy qabyldaý bólimderi trıaj júıesine ótti, «jedel járdem dárigeri» degen mamandyq engizildi. Osynyń arqasynda aýrýhanaǵa jetpeı kóz jumǵandar sany 0,4 paıyzǵa qysqardy.
Elbasynyń 2019 jyly 1 maýsymnan bastap tabysy tómen jumysshylardyń jalaqysyn 30 paıyzǵa kóterý týraly tapsyrmasyna saı bıyl qosymsha 43 mlrd teńge, 2020-2021 jyldarǵa – 87 mlrd teńge bólingen.
Dáriger tapshylyǵyn joıý jolynda da kóptegen jumys atqarylýda. Mınıstrlik medısınalyq joǵary oqý ornyndaryn memlekettik grantpen támamdaǵan jas mamandardy aımaq, aýylǵa baryp úsh jyl jumys isteýdi mindettep otyr. Eljan Birtanov osy oraıda óńir ákimderiniń aýylǵa kelgen jas dárigerlerge durys kóńil bólýin eskerdi.
Densaýlyq saqtaý salasyndaǵy ınfraqurylymdy jetildirý úshin úsh jylda 600 nysan ashylady dep josparlanýda. Astanada zamanaýı onkologııa ortalyǵy ashylmaq. Balalarǵa sapaly medısınalyq kómek kórsetý isi úzdiksiz jetildirilip keledi. Buǵan qosa, mindetti áleýmettik medısınalyq saqtandyrý júıesine daıyndyq jalǵasýda. TMKKK jańa modeli jasaldy. MÁMS men TMKKK boıynsha medısınalyq qyzmettiń paketi daıyndaldy.
Elbasynyń tapsyrmasymen 5 jylda bilim, ǵylym men densaýlyq saqtaý salasyna bólinetin qarjynyń kólemi jylpy ishki ónimniń 10 paıyzyna jetýi tıis. Osy oraıda 2020-2025 jyldarǵa arnalǵan memlekettik jańa densaýlyq saqtaý baǵdarlamasynda densaýlyq saqtaý salasynyń shyǵynyn jalpy ishki ónimniń 5 paıyzyna jetkizý týraly jazylǵan. Bul qarjy profılaktıkaǵa jáne halyq arasynda salamatty ómir saltyn nasıhattaýǵa, qoǵamdyq densaýlyq saqtaý qyzmetin jetildirý men medısınalyq-sanıtarlyq alǵashqy kómekke bólingen qarjy kólemin 60 paıyzǵa jetkizýge jumsalady. Sonymen qatar, densaýlyq saqtaý salasyndaǵy adam kapıtalyn damytýǵa jáne dárigerlerdiń eńbekaqysyn 2,5 esege arttyrý úshin de qarjy qaralǵan, - dedi mınıstr.
Memlekettik jańa baǵdarlama aıasynda medısınalyq mekemeler modernızasııadan ótedi, densaýlyq saqtaý salasyndaǵy biryńǵaı sandyq keńistikti damytý isi jalǵasady. Jalpy, medısınalyq kómektiń sapasyn jaqsartýǵa baǵyttalǵan jumystardyń nátıjesinde el azamattarynyń ómir súrý uzaqtyǵyn 2025 jylǵa deıin 75 jasqa jetkizý josparlanǵan.
