Sport • 23 Mamyr, 2019

Áýesqoı boks Olımpıada baǵdarlamasynda qalatyn boldy

1670 ret
kórsetildi
1 mın
oqý úshin

​Halyqaralyq Olımpıada komıteti Lozannada (Shveısarııa) ótken kezekti jıynynda áýesqoı boks 2020 jyly Tokıoda (Japonııa) uıymdastyrylatyn Olımpııa oıyndarynyń baǵdarlamasynda qalatynyn málimdedi.

Áýesqoı boks Olımpıada baǵdarlamasynda qalatyn boldy
2018 jyldyń qarasha aıynda HOK áýesqoı boksshylardyń Tokıo Olımpıadasyna joldama berýshi jarystarǵa qatysýyna shekteý qoıyp, AIBA-ny Halyqaralyq Olımpıada komıtetiniń músheliginen shyǵarǵan-dy. Osylaısha, áýesqoı boks alty aıǵa sozylǵan «nokdaýnnan» keıin esin jyıdy. Endi boksshylardyń Olımpııa oıyndaryna irikteý jarysy men Olımpııada kezinde boks jekpe-jekterin uıymdastyrý – Halyqaralyq gımnastıka federasııasynyń prezıdenti Morınarı Vatanabege tapsyryldy. Sonymen qatar Olımpıadaǵa joldama berýshi týrnırler 2020 jyldyń qańtar men mamyr aralyǵynda ótedi dep josparlanýda.

Aıta keteıik, Halyqaralyq Olımpıada komıteti Tokıo Olımpıadasyna burynǵydaı 286 boksshy qatysatynyn málimdedi. Biraq erler men qyzdar arasyndaǵy salmaq dárejeleri ózgeretindigi týraly eshqandaı málimet bergen joq. Buǵan deıin erler arasynda 2 salmaq dárejesi qysqaryp, qyzdar básekesinde 2 salmaq dárejesi qosylýy múmkin delingen edi.