Bul týraly mádenıet jáne óner qyzmetkerleri kúninde aımaq basshysy Amandyq Batalov aıtqan bolatyn. Sala mandaryn quttyqtaǵyn ol:
- Bizdiń búgingi qoǵamda ónerdiń san alýan túri bar. Dese de olardyń barlyǵynyń da maqsat-mindeti bir. Ol – adamnyń estetıkalyq talǵamyn qalyptastyrýǵa, sezimin tárbıeleýge, qorshaǵan ortany kórkemdik kózimen kórýge úıretý. Sol arqyly adamzatqa rýhanı azyq berý. «Sheberdiń qoly ortaq, sheshenniń sózi ortaq» degende halyq osyny aıtsa kerek. Kez kelgen el ónerimen, mádenıetimen tanylyp, baǵalanatyny anyq. Sondyqtan da atqaryp jatqan ıgi isterińizge tabys tileımin. О́nerdiń óresi bıik, aıdyny keń bolyp, elimizdiń rýhanı baılyǵy arta bersin! Barsha jetisýlyq ónerpazdarǵa shyǵarmashylyq jetistik pen baqyt tileımin, - dedi.
Sondaı-aq, sharada «Úzdik mádenıet qyzmetkeri» nomınasııasy boıynsha oblystyń aýdan, qalalarynan 20 qyzmetker marapattaldy. Olardyń arasynda ártister, aýyldyq klýbtardyń, mádenıet úıleriniń, kitaphanalardyń, shyǵarmashylyq ortalyqtardyń, aýdandyq mádenıet jáne tilderdi damytý bólimderiniń qyzmetkerleri bar. Árbir jeńimpazǵa dıplom men 100 myń teńgeniń sertıfıkaty berildi. Jáne «Halyqtyq, úlgili ataǵy bar úzdik ujym», «Úzdik teatr ártisi», «Úzdik mádenıet úıi», «Úzdik kitaphana», «Úzdik mýzeı», «Úzdik ánshi», «Úzdik aspapshy», «Úzdik bıshi», «Úzdik oblystyq mádenıet mekemesi» atalymdary boıynsha da top jarǵandar anyqtaldy. Atap aıtqanda, «Úzdik oblystyq mádenıet mekemesi» nomınasııasyn usta Dárkembaı atyndaǵy qolóner mýzeıi jeńip aldy, mýzeıge júlde syıy retinde «Lada Granta» avtokóliginiń kilti tapsyryldy.
Oblystyń mádenıet salasyn damytýǵa qosqan úlesi úshin birqatar azamattar «Mádenıet salasynyń úzdigi» tós belgisimen marapattaldy. Olardyń qatarynda Súıinbaı atyndaǵy oblystyq fılarmonııanyń M. Tólebaev atyndaǵy halyq aspaptary orkestriniń aspapshy ártisi Muhtar Stybaev, Kerbulaq aýdany Altynemel aýyldyq mádenıet úıiniń mýzyka jetekshisi Sáýle Qojahanova da bar.
Sonymen birge jıyrmaǵa jýyq mamanǵa QR Mádenıet jáne sport mınıstrliginiń, oblys ákiminiń qurmet gramotalary men alǵys hattary berildi.
