Baspana máselesin daýlap kelgen kóp balaly analardyń aldynda qala basshysy saladaǵy problemalardy barynsha túsindirip, jan-jaqty maǵlumat berdi. Jınalǵandardy kez kelgen usaq-túıekke shý kótere bermeı, naqty máselemen ún qatyýǵa jáne ýaqytsha qıyndyqtarǵa sabyrly bolýǵa shaqyrdy.
«Eń bastysy, turǵyn úı kezeginde turǵan 24 myń baspanaǵa muqtaj otbasynyń ótinishi jyl aıaǵyna deıin qaralatyn bolady. Olardy qoljetimdi baspanamen qamtýǵa barlyq múmkindikter jasalatynyna sendirgim keledi. Bul baǵytta qalada qyrýar sharýalar qolǵa alynýda», - degen Ilııa Ispanov kezekte turǵandardyń arasynda qaı sanattaǵy otbasylardyń tez arada páter ala alatynyn túsindirdi.
Páter máselesin daýlap kelgenderdiń arasynda 2009 jyldan beri jaldamaly baspanada turatyn Amangúl Syrymbetova da bar. Úsh bala tárbıelep otyrǵan jalǵyzbasty ana tapqan-taıanǵany páteraqy tóleýden aspaıtynyn, balalarynyń qajettikterine qarajat jetispeıtinin aıtty. «Bazarda saýdamen aınalysyp kún kórip júrgen maǵan ákimdik eń bolmasa aı saıyn ózim arendasyn tólep otyrǵan shańyraqty satyp áperse», - deıdi ol.
Aıta keteıik, baspanaly bolý úshin kórsetilgen talaptarǵa saı úı kezeginde turǵandardyń Turǵyn úı qurylys jınaq bankinde 6 aı boıy jınaǵan qarjysy bolýy shart. Al basqa bankterdegi nesıe qaryzyn ýaqytynda tóleı almaǵan jaǵdaıda olarǵa qoljetimdi baspana berilmeıdi. Baǵdarlamanyń sanattyq deńgeıi kóp balaly analar men tolyq emes otbasylarǵa arnalǵan.
