Jıynda Nur-Sultan qalasynan kelgen ókil saılaý zańnamasyndaǵy ózgeristermen, saılaý naýqanynyń negizgi kezeńderimen, kandıdattardyń saılaý aldyndaǵy úgitti júzege asyrý sharttarymen tanystyrdy. Ári, saılaý komıssııalarynyń saılaýdy ázirleý men ótkizý jónindegi ókilettikterimen, aýmaqtyq saılaý komıssııalaryn jáne jergilikti atqarýshy organdardyń múmkindikteri shekteýli azamattardyń quqyqtaryn qamtamasyz etý jónindegi mindetterin aıtyp berdi.
«Ýchaskelik saılaý komıssııalary jumysyn bastady. Biz osy daıyndyq jumystaryn pysyqtap alýymyz kerek. Saılaý týraly zańǵa ózgerister enip otyr. Bıylǵy uıymdastyrý naýqanynda birqatar jańashyldyqtar bar. Endi saılaý komıssııasynyń músheleri jumysty júıeli uıymdastyrý kerek», dedi Lázzat Jańylysqyzy.
Alqaly jıynda Shymkent qalasy ákimi apparatynyń basshysy Erkeǵalı Álimqulov bıylǵy saılaý naýqany kezinde turǵyndar saılaý ýchaskelerin adaspaı tabýy úshin atalǵan oryndardy 2GIS elektrondy kartasyna engizip jatqandyǵyn jetkizdi. Sondaı-aq saılaýshylardyń tizimderin jasaý, saılaý ýchaskelerin materıaldyq-tehnıkalyq jaraqtandyrý boıynsha, onyń ishinde múmkindigi shekteýli azamattardyń jaǵdaılaryn qamtamasyz etý boıynsha qabyldanǵan is-sharalar týraly baıandady.
«Qalada 260 saılaý ýchaskesi jumys isteıdi. Onyń ishinde 25 ýchaske jańadan qurylyp otyr. Bekitilgen kúntizbege sáıkes, daıyndyq jumystary júrgizilýde. Shymkentte 568 794 saılaýshy bar. Qala ákimdigi tarapynan saılaýdy uıymdastyrýdaǵy sıfrly tehnologııalardy qoldaný, múmkindigi shekteýli azamattardyń saılaýǵa belsene qatysýyna barlyq jaǵdaı qarastyrylýda», dedi apparat basshysy.
