Júlde sharty boıynsha 50 myń fýnt-sterlıng Alharthı men aýdarmashy Merılın Být arasynda teńdeı bólingen. Syılyqty uıymdastyrý komıtetiniń saıtynda Djoha Alharthıdiń Parsy shyǵanaǵy elderi arasynan aǵylshyn tiline aýdarylǵan omandyq birinshi romanıst áıel ekendigi aıtylǵan. Jazýshynyń buǵan deıin eki romany, qysqa áńgimeler jınaǵy jáne balalarǵa arnalǵan kitaby jaryq kórgen.
«Aspan deneleri» kitaby otarlyq dáýirden keıingi Omannyń qazirgi damý satysynda kórinis tabatyn apaly-sińlili úsheýdiń otbasylyq ómir joly jaıynda syr shertedi. «Bólmede bastalyp, álemge ulasatyn oqıǵa ýaqyt pen ólim-jitimniń tereń máselelerin jáne jalpy tarıhymyzdyń úreıli tustaryn sheshýde aıqyndylyqty kórsetedi. Aýyzeki til men poezııa yrǵaǵy sátti úndesken aýdarma dálme-dál berilgen», deıdi qazylar alqasynyń tóraǵasy, tarıhshy Bettanı Hıýz.
