Ata-anasynyń qamqorlyǵynsyz qalǵan balalarǵa áleýmettik-patronattyq qoldaý kórsetýdi maqsat etken sharada óńirdiń tanymal ánshileri men mádenıet maıtalmandary óner kórsetip, óz úlesterin qosty. Qaıyrymdylyq konsertten jáne ótkizilgen aýksıonnan túsken qarajat ıelerine sertıfıkattar tapsyryldy. Al, jetim balalarǵa meıirimdilik kórsetip, demeýshilik tanytqan azamattar Alǵys hattarmen marapattaldy.
«2016 jyldan bastap ata-anasynyń qamqorynsyz qalǵan balalardy turǵyn úımen qamtamasyz etý úshin oblys jáne qala basshylyǵy ótkizetin arnaıy aksııamyz júrip jatyr. Oǵan jetistikke jetken aqtóbelikter, bıznesmender qatysýda jáne olarǵa kómektesýge múmkindigi bar. Osy ýaqyt ishinde balalarǵa 38 mıllıon teńge jınaldy. 120-dan astam bala óz páterlerinde turyp jatyr. Sizderge de osyndaı kómekterińiz úshin alǵysymdy bildiremin", - dedi Ilııas Ispanov kópshilikke.
Aıta keteıik, jyl basynan beri óńirde kóptegen qaıyrymdylyq is-sharalary ótti. Aqtóbe oblysy ákiminiń tapsyrmasymen qalada jetim jáne ata-anasynyń qamqorlyǵynsyz qalǵan balalardy qoldaý boıynsha keshendi jumystar júzege asyrylýda. Qala ákimdigi de osyndaı muqtaj jetkinshekterge qoldaý kórsetýde árdaıym belsendilik tanytady. Máselen, qala ákimi Ilııas Ispanovtan bastap, bólim basshylary men olardyń orynbasarlaryna, qalalyq máslıhat depýtattaryna, vedomstvolyq baǵynystaǵy kásiporyndarǵa jetim balalar bekitilgen. Olar «Turǵyn úı qurylys jınaq banki» AQ-da ashylǵan sol balalardyń jeke shottaryna aı saıyn jalaqylary esebinen qarajat salyp otyrady.
