Shymkent sotynda «Baqytyńdy balańnan izde!» atty kezdesý ótti

«Qazaqstan Respýblıkasy Joǵarǵy Sotynyń bastamasymen respýblıkamyzdyń 4 oblysynda otbasylyq quqyqtardy qorǵaýǵa baǵyttalǵan «Otbasylyq sot» pılottyq jobasy iske qosyldy. Bul jobanyń mindeti: otbasylyq janjaldardyń sebepterin anyqtap, sot prosesiniń barlyq satysynda daýlasýshy taraptarmen tatýlastyrý sharalaryn júrgizý, otbasy quqyqtary men múddelerin, onyń ishinde kámeletke tolmaǵandardyń quqyqtaryn qorǵaýdy qamtamasyz etý. Shymkent qalalyq sotynyń tóraǵasy Erbol Rahymbekovtiń 2018 jylǵy 4 jeltoqsandaǵy О́kimimen Eńbekshi aýdandyq sotynyń bazasynda «Otbasylyq sot» Pılottyq jobasyn júzege asyrýǵa kirisken edik. Jarty jyldan beri júzege asyrylyp kele jatqan osy joba qazirgi ýaqytta tıimdiligin kórsete bastady. О́zderińizben otbasyn saqtap qalý, balalardyń quqyqtaryn qorǵaý máseleleri boıynsha keńese otyryp jáne suqbat júrgizip, suraqtaryńyzǵa jaýap berip, oı-pikirlerińizdi tyńdasaq»,  dedi alqa tóraǵasy.

Alqaly jıynda otbasylyq janjaldardyń sebepterin anyqtaý, sot prosesiniń barlyq satysynda taraptardy tatýlastyrý sharalary, onyń ishinde azamattardyń sotta nemese sottan tys tatýlasýyna múmkindik berý, otbasy quqyqtary men múddelerin qorǵaýǵa arnalǵan másele qozǵaldy. Ári, otbasy qundylyǵyn saqtaýda  ásirese kámeletke tolmaǵandardyń quqyqtaryn qorǵaýdy qamtamasyz etý jaıy keńinen talqylandy.

«Búgingi tańda Eńbekshi aýdandyq sotymen otbasyn saqtap qalý, janjaldardyń aldyn alý maqsatynda bastapqy tegin psıhologııalyq kómek kórsetilip, otbasylyq qundylyqtardy nasıhattaý boıynsha is-sharalar júrgizilýde»,  dedi Eńbekshi aýdandyq sotynyń tóraǵasy Aıdos Sultanov.

Kezdesýde sóz alǵan qoǵam qaıratkeri, QR Parlamenti Májilisiniń V shaqyrylymdaǵy depýtaty Orazkúl Asanǵazyqyzy otbasy jáne neke qatynastarynyń buzylýyna mahabbattyń joqtyǵy sebep bolyp otyr deıdi.  Qoǵam qaıratkeriniń pikirinshe, bir-birin shyn jaqsy kórip, mahabbatpen qosylsa, eki tarapty eshkim de ajyrata almaıdy. Tipti, otbasy atty ustahananyń tájirıbeli ustasyna aınalady. Ol ustahanadan namysty ul, qylyqty qyz tárbıelenip shyǵarmaq.

Spıkerlerdi uıyp tyńdaǵan jastar kezdesýge belsene qatysyp, «Toqtamsyz kerise beretin ata-anasyna bala qalaı kómektespek? Teledıdardaǵy «Qalaýlym», «Kel, kelinim!» sııaqty baǵdarlamalar týraly ne oılaısyz?» degen suraqtaryn qoıyp, oǵan tushymdy jaýap aldy. Ári, otbasyn qurýǵa nıettenip júrgen jastarǵa ulttyq qundylyqtarǵa negizdelgen shańyraq kóterý týraly kýrstar ashylsa degen usynystaryn jetkizdi.

Sonymen qatar, shara barysynda «Otbasylyq sot» pılottyq jobasynyń maqsat-mindetteri, erekshelikteri kórsetilgen býkletter taratyldy. 

Aıta keterligi,  osy jyldyń 4 aıynda neke jáne otbasy qatynastaryna qatysty 251 talap-aryz túsip, onyń 73 isi boıynsha nekeni buzý týraly sheshim qabyldanǵan, 37 talap aryzy boıynsha taraptardyń tatýlasýyna baılanysty is-júrgizý toqtatylǵan.9 talap aryz qaraýsyz qaldyrylǵan. 146 talap aryz (qaldyq ister boıynsha) boıynsha sýdıa jáne psıhologpen aldyn ala áńgimelesý satysy júrgizilýde.