25 mamyr kúni «Úrker-2019» ulttyq syılyǵyna qatysý úshin ótinim qabyldaý bastaldy. О́tinimder 2019 jyldyń 25 mamyry men 20 maýsymy aralyǵynda www.urker-awards.kz resmı saıtynda ornalastyrylǵan úlgige sáıkes qabyldanady.
Ulttyq syılyq baspa, radıo, ınternet-jýrnalıstıka salasyndaǵy úzdik jetistikteri úshin beriledi. Sonymen qatar, atalǵan syılyq óńirlerdegi mýltımedıalyq jýrnalıstıkany damytýǵa yqpal etý, jýrnalıstıka mártebesin kóterý, kásibı standarttar men krıterıılerdi bekitý, qoǵamnyń azamattyq belsendiligin arttyrýǵa baǵyttalǵan.
Ulttyq syılyqtyń negizgi maqsaty - talantty jýrnalıster men shyǵarmashylyq ujymdardy anyqtaý, olardyń kásibı jýrnalıstıkany damytýǵa qosqan úlesterin taný jáne shyǵarmashylyqtaryna qoǵamnyń nazaryn keńinen aýdarý bolyp tabylady. Syılyqtyń quryltaıshysy jáne uıymdastyrýshysy - Qazaqstan Respýblıkasynyń Aqparat jáne qoǵamdyq damý mınıstrligi.
Bıylǵy jyly ótinishter kelesideı nomınasııalar boıynsha qabyldanady:
1) Jyl fotografııasy;
2) Jyl reportajy;
3) Jyl analıtıkalyq materıaly;
4) Jyl jýrnalıstik zertteýi;
5) Jyl suhbaty;
6) Qazaqstan týraly jyldyń tanymdyq materıaly;
7) Jyl radıostansııasy;
8) Jyl aqparattyq portaly;
9) Jyl gazeti;
10) Jyl jýrnaly;
11) Jyl new media (telegram-kanal, áleýmettik jelilerdegi úzdik aqparattyq pablık).
Bıylǵy jyly dástúrli nomınasııalardan bólek, «Jyl new media» nomınasııasy taǵaıyndalyp otyr. Bul nomınasııaǵa qatysý úshin ótinimdi tanymal aqparattyq telegram-kanaldar jáne áleýmettik jelilerdegi belsendi toptar men pablıkter bere alady.
Úzdikterdi arnaıy qurylǵan komıssııa aıqyndaıtyn bolady. Komıssııa quramyna elimizdiń medıa salasynyń damýyna eleýli úles qosqan tanymal medıa menedjerler, jýrnalıster, qoǵam qaıratkerleri kiredi. Jeńimpazdarǵa 1 000 000 teńge jáne syılyqtyń arnaıy estelik músinshesi tabystalady.
Esterińizge sala keteıik, Baspa, radıo jáne ınternet-jýrnalıstıka salasyndaǵy «Úrker» ulttyq syılyǵy 2017 jyly taǵaıyndalǵan. Eki jyl ishinde elimizdegi beldi basylymdar, ınternet-portaldar men jýrnalısterge jalpy sany 26 syılyq tabystalǵan, olardyń ishinde - aqparattyq agenttikter, óz oqyrmany qalyptasqan taqyryptyq basylymdar da boldy.
Barlyq suraqtar boıynsha uıymdastyrý komıtetiniń telefony: +7 (7172) 79-82-15.
