Taraptar ekijaqty jáne kópjaqty yntymaqtastyq máselelerin talqylap, parlamentaralyq únqatysýdyń mańyzdy rólin atap ótti.
D.Nazarbaeva eki el depýtattarynyń nátıjeli qyzmetin, atap aıtqanda, ınnovasııa salasyndaǵy yntymaqtastyqty damytý jónindegi kishi komıssııanyń jumysyn atap ótti. «Sáýir aıynda bizdiń senatorlar Mınskide bolyp, kishi komıssııanyń birinshi otyrysyn ótkizdi jáne aqparattyq tehnologııalar parkinde kórsetilgen jetistikterdi tamashalady. Osy saladaǵy yntymaqtastyqty Nur-Sultandaǵy EKSPO alańynda tereńdetý qajet», - dedi Senat basshysy.
Parlamenttiń joǵarǵy Palatasynyń tóraǵasy sondaı-aq taýar aınalymy men tehnologııalar transfertin arttyrýǵa baǵyttalǵan birlesken is-qımyl jospary aıasyndaǵy jumysqa qarqyn berýdi usyndy. D.Nazarbaevanyń pikirinshe, «ázirge bul baǵyttaǵy jumys tek qaǵaz júzinde júrgizilip keledi».
Kezdesý barysynda 29 mamyr kúni Nur-Sultanda ótetin EAEO mereıtoılyq sammıtiniń mańyzy atap ótildi. Sammıt Eýrazııalyq yqpaldastyqty damytýda jáne elder arasyndaǵy ekonomıkalyq ózara is-qımyldy keńeıtýde mańyzdy shara bolady. «Qysqa ýaqyt ishinde aýqymdy jumystar jasaldy, is-qımyl aıasy belgilendi, al eń bastysy – yntymaqtastyqty damytý men nyǵaıtý jónindegi saıası erik-jiger bar. Ekonomıkalyq múddeler yqpaldastyq úderisterdiń basty qozǵaýshy kúshi bolýy tıis», - dedi Senat Tóraǵasy. Ol ekonomıkalyq yntymaqtastyqtyń keleshegi zor baǵyttaryn, onyń ishinde kólik-logıstıka salasyn atap ótti.
«Biz qazaqstandyq ınvestorlardy kútemiz», - dedi Belarýs Elshisi. Mádenı-gýmanıtarlyq yntymaqtastyq týraly aıta kelip A. Nıchkasov halyqaralyq «Slavıanskıı bazar» óner festıvaline daıyndyq týraly habardar etip, D.Nazarbaevany óner merekesine qurmetti qonaq retinde shaqyrdy.
