Qazaqstandyq ǵalym áıelder qoǵamynyń prezıdenti, fılologııa ǵylymynyń doktory, professor Tańat Aıapova sharanyń negizgi baǵyt-baǵdarymen tanystyryp ótip, ǵalym retinde qoǵamǵa úles qosý, ulttyq tárbıege, qoǵamymyzdaǵy kókeıtesti máselelerge arnalǵan ǵylymı zertteýler, mádenı, áleýmettik is-sharalardyń ótkizilýin uıymdastyrý barysyna toqtaldy.
Qazaqstandyq ǵalym áıelder qoǵamy otbasy men genderlik saıasat jóninde ǵylymı-tájirıbelik zertteýlerdi júzege asyrýǵa múmkindik beretin jobalardy ázirleýmen qatar ulttyq sanany qalyptastyrýdaǵy ana tiliniń, tól mádenıettiń jáne otbasynyń róli, jahandaǵy zamanaýı ulttyq mádenıetti damytý máselelerine erekshe kóńil bólip keledi. Búginde qoǵamdy izgilendirýge baǵyttalǵan birneshe jobalardy ázirlegen qoǵam músheleri Jastar úıi ortalyǵynyń jumysyna da belsene qatysatyn bolady. Ortalyqta belgili ǵalymdar, úlgili otbasy músheleri arnaıy sabaqtar ótkizip, úlgili otbasyn qurýǵa baılanysty shyǵarmashylyq semınarlar, forýmdar ótkizetin bolady.
Osy sharaǵa arnaıy shaqyrylǵan Qazaqstan Ǵalymdar odaǵynyń Prezıdenti, QR UIA akademıgi, ekonomıka ǵylymdarynyń doktory, professor Orazaly Sábden áıel ǵalymdar basqosýyna qoldaý bildirip, órkenıet baspaldaǵynda turǵan memleket úshin talanttardy biriktirý qajettigin alǵa tartty. «Áıeldiń róli otbasynda ǵana emes, qoǵamnyń barlyq salasynda mańyzdy. Búginde álem jańa órkenıet baspaldaǵynda tur. Áıel er adamdarmen qatar ulttyń ımmýnıtetin qalyptastyrýshy kúsh. Keshegi tarıhymyzdaǵy Tumar, Umaı, Domalaq analar rýhyn jandandyratyn kezeń týdy. Qoǵamǵa jańa serpilis týdy. Oı-sana qory qosylǵanda ǵana el alǵa jyljıdy. Sondyqtanda áıel ǵalymdardyń potensıalyn jaqsylap paıdalaný kerek» degen akademık qoǵamnyń jumysyna sát-sapar tiledi.
Forýmǵa qatysty pikirimen bólisken fılologııa ǵylymdarynyń kandıdaty Álıma Ysqaǵıeva ulttyq qundylyqtarymyzdy joǵaltpaı taza sóıleýge úıretý, balalardyń sóıleý mádenıetin arttyrý, ana tilimizdi kórkeıtip, halyqymyzdyń salt-dástúri men tárbıesin bala boıyna sińirýdegi mindetterge toqtalyp ótse, fılosofııa ǵylymdarynyń doktory Zamza Qodar genderlik saıasatqa qatysty pikirin bildirdi. Áıelder búginde otbasynda ǵana emes, qoǵamnyń barlyq salasynda joǵary jaýapkershilikke ıe. «Biz óz mentalıtetimizge saı er adamdy syılaý, úlken adamdy qurmetteý, qyz bala tárbıesine uqypty qaraý sııaqty erekshe qundylyqtarymyz bar. О́rkenıet baspaldaǵynda turǵan Qazaqstan osyndaı qundylyqtaryn damyta otyryp, áıel adamdardyń qoǵamǵa qosatyn úlesiniń qomaqty ekenine kóz jetkize túsemiz», dep atap ótti ǵalym.
Forým barysynda sonymen qatar «Atameken» UKP Adamı kapıtaldy damytý bóliminiń basshysy Vera Szın, qoǵam qaıratkeri Asyly Osman, t.b. ǵalymdar óz pikirlerimen bólisip, áıel ǵalymdardyń jahandaný zamanynda ulttyq qundylyqtardy dáripteýge, damytýǵa qosatyn úlesi týraly usynystaryn ortaǵa saldy.
ALMATY
