Áskerı qyzmetshiler úshin áskerı salttar erekshe maqtanysh týǵyzady. Osy kúnderi, áskerı salttardyń biri «Batys» óńirlik qolbasshylyǵynyń barlyq áskerı bólimderinde ótkizilip, túrli laýazymdaǵy jaýyngerlerge jeke qarý men áskerı tehnıkalar senip tapsyryldy. Bul shara áskerılerdi óz qarýyn uqypty ustaýǵa, súıýge jáne jaýapty bolýǵa baýlıdy.
Qaýipsizdik erejelerin jetkizý boıynsha keshendik sabaqqa Aqtaý, Atyraý jáne Aqtóbe garnızondarynyń barlyq áskerı qyzmetshileri qatysty. Olar úshin arnaıy 13 oqý orny ázirlendi. Bul is-sharanyń basty maqsaty – jeke quramǵa qaýipsizdik erejelerin jetkizip, órt jaǵdaılary men kúndelikti tirshiliktegi jaraqattaný jaǵdaılaryn boldyrmaý, olar oryn alǵan jaǵdaıda qajetti is-sharalardy boldyrmaý, jaýyngerlik daıarlyq, qurylys, qyzmet kórsetý jáne parktik-sharaýshylyq jumystary kezinde bolýy múmkin túrli faktorlardy eskertý bolyp tabylady.
«Batys» óńirlik qolbasshylyǵynyń materıaldyq-tehnıkalyq qamtamasyz etý ortalyǵynyń shtab bastyǵy podpolkovnık Rýslan Kýbashevtiń aıtýynsha, búgingi kúni óńirlik qolbasshylyqtyń barlyq áskerı bólimderi jazǵy oqý kezeńine tolyqtaı daıyn. Barlyq áskerı tehnıkalar jazǵy paıdalaný jaǵdaıyna keltirildi, qujattama jáne oqý-materıaldyq baza ázir, sondaı-aq áskerı polıgondar qaýipti jarylǵysh zattardan tazartylyp, kez-kelgen jıiliktegi oqý-jattyǵýlardy ótkizýge daıyn. Áskerı bólimniń qajet deńgeıindegi qorlary qalpyna keltirilgen.
2019 jyl Qarýly Kúshterimizde «Rýhanı jańǵyrý – jaýyngerlik rýh tiregi» uranymen ótýde, al jazǵy oqý kezeńi 3 maýsym kúni bastalatyn bolady.
