«Baqytty balalyq shaqtyń kúzetinde» degen uranmen ótip jatqan osy ıgi shara Qazaqstan Respýblıkasy Ishki ister mınıstrligi (QR IIM), Ishki ister organdary (IIO) ardagerleri keńesi jáne respýblıkalyq «Dınamo» dene-shynyqtyrý men sport qoǵamynyń muryndyq bolýymen uıymdastyrylyp otyr. Bul kúnderi 7 myńnan asa jas dınamoshylar, balalar úıiniń tárbıelenýshileri, ıývenaldy polısııanyń tirkeýinde turǵan jasóspirimder jáne IIO qyzmetkerleriniń balalary sporttyń birneshe túri boıynsha saıysqa túsýde.
Jarystyń ashylý saltanaty Almatydaǵy «Dınamo» stadıonynda ótti. «QR Generaldar keńesi» prezıdıýmynyń tóraǵasy, ádilet general-maıory Rústem Haıdarov, IIO ardagerleri keńesiniń tóraǵasy, mılısııa general-maıory Saǵynjan Asyl-Keneı jáne taǵy basqa ataqty dınamoshylar kópshilikke quttyqtaý sózderin arnap, qatysýshylarǵa aq jol tiledi.
Jıyn barysynda sóz alǵan dańqty balýan, grek-rım kúresinen qos birdeı Olımpıada júldegeri, álem, Eýropa, Azııa chempıony Dáýlet Turlyhanov: «Dınamo» ortalyq keńesi osy aýqymdy sharany Balalar kúni qarsańynda ótkizýde. Bul da bir quptarlyq is. Qurmetti qonaq retinde shaqyrylǵan men osy jarysqa qatysýǵa kelgen jas órenderdiń kóptigin kórip, erekshe súısinip otyrmyn. Qazirgi kezde balalar eresek ómirge daıyndalýda. Osy jolda olar sportty serik etse, nur ústine nur bolady. Men osy bastamalaryńyzdy tolyqtaı quptaımyn. Aldaǵy ýaqytta da úlken tabystarǵa jetińizder! – dep aqtaryla sóıledi.
– «Dınamo» – meniń ajyramas bir bóligim, – dep qostady óz áriptesin, ataqty boksshy, Máskeý Olımpıadasynyń kúmis júldegeri Vıktor Demıanenko. – Aıtýly qoǵamnan talaı darabozdar shyqqany barshaǵa málim. Olar asa iri halyqaralyq jarystarda elimizdiń sporttyq dańqyn asqaqtatty. Men de sporttyq jolymdy dál osy stadıonda bastaǵanmyn. Sol kezdegi keremet boks zaly kúni búginge deıin kóz aldymda».
Sóz kezegi tıgende áıgili vaterpolshy, dańqty «Dınamonyń» serke oıynshysy, Olımpıada chempıony Sergeı Kotenko: «Osyndaı órimdeı jastardyń sportqa myqtap den qoıǵandaryn kórip, erekshe shattanyp turmyn. Erteńgi kúni sol órenderdiń arasynan myqty sportshylardyń shyǵatynyna qylaýdaı da kúmánim joq», – dep tebirene sóıledi.
