Sońǵy kúni avtoshabandozdar 290 shaqyrym qashyqtyqty baǵyndyrdy. Arnaıy ýchaskeniń jartysynan astamy «Rallı Qazaqstan» úshin jańa aýmaqtar boldy. 65 kılometrden keıin dala joldary rallısterdi Qyzylqum shóliniń qumdy alqabyna ákeldi, al bul jerde qazaqstandyq kezeń buryn ótip kórmegen. Sodan keıin dala joldary men sor joldar bastaldy, al 277 kılometrde marshrýt tas alqaby arqyly ótti, ol jerde jylqylar men túıeler jaıylatyn kóptegen qudyqtar kezdesti.
Besinshi arnaıy ýchaskeni birinshi bolyp Iаzıd Ál-Radjı men Dırk fon Sısevıstiń ekıpajy 2 saǵat 58 mınýt nátıjesimen basyp ótti. Bul - komandanyń bes kezeńdegi ekinshi jeńisi. Eger úshinshi kezeńniń máresinde sporttyq erejeni buzǵany úshin 4 saǵattyq penalızasııa bolmaǵanda, ekıpaj «Rallı Qazaqstan 2019» jarysynda birinshi orynǵa talasar edi. Qazir ekıpaj jalpy esepte tek 7-shi orynda.
Fransýz avtoshabandozy Stefan Peteransel jalpy esepte óz pozısııasyn jaqsartýdy jalǵastyrýda. Búgin erli-zaıypty Stefan men Andrea Peteranseldiń ekıpajy kúnniń ekinshi nátıjesin kórsetti. Osy jetistiktiń arqasynda olar tórtinshi orynnan ekinshi orynǵa kóterilip, jarys kóshbasshysy Nasser Ál-Attııadan jalpy esepte 5 mınýt jáne 38 sekýndqa artta keledi.
- Keshe biz tórtinshi orynda boldyq. Búgin, árıne, oǵash jaǵdaı boldy. Bizdiń aldymyzda bolǵan úsh avtojarysshy tehnıkalyq problemalarǵa tap boldy. Nasser 30 mınýt joǵaltty, meniń bilýimshe, qalǵandary odan da kóp. Biraq qazir biz ekinshimiz, bul biz kútkendegiden jaqsy. Erteń biz Nasserge qysym kórsetýge tyrysamyz jáne odan ne shyǵatynyn kóremiz. Bul - tehnıkalyq sport, sondyqtan bizde múmkindik bar dep aıtýǵa bolady, dedi Stefan Peteransel fınıshten keıin.
Búgin tez tegis joldarda Petransel ekıpajy barynsha ekpindi, al kúrdeli tasty jáne qumdy aımaqtarda ońtaıly marshrýtty tańdap, tehnıkalyq synýlar men dóńgelekterdi tesip alýdan aýlaq bolýǵa umtyldy. Osylaısha, kóp jyldyq tájirıbe, esep jáne sáttilik búgin erli-zaıyptylar ekıpajyna kúndi sátti aıaqtaýǵa kómektesti.
Chehııalyq avtojarysshy Mıroslav Zapletal óziniń Hummer H3 Evo VII-ge máre syzyǵyn úshinshi ret kesip ótip, týrnır kestesinde óz nátıjesin jaqsartty. Qazir Mıroslav Zapletal men Marek Sıkoranyń ujymy tórtinshi orynda tur, alaıda olar men úshinshi oryn arasyndaǵy alshaqtyq 45 mınýtty quraıdy.
2017 jáne 2018 jyldardaǵy «Rallı Qazaqstan» kúmis júldegeri Iаkýb Pshıgonskı úshin besinshi arnaıy ýchaskede kún óte sátsiz boldy. Nasserdiń kóligi jol ortasynda toqtap qalǵan soń, búgin ol jeńiske anaǵurlym jaqyn boldy. Alaıda, avtoshabandoz shuńqyrǵa túsip, onyń avtomobıli aýdarylyp qaldy.
- Kún qalypty ótti. Kýba jaqsy aıdady. 160 shaqyrymda men ony eskertip úlgermedim, aldymyzda jol kitaby boıynsha «eki ese qaýipti» shuńqyr boldy jáne biz aýdarylyp qaldyq. Kýbada tejep úlgerýge múmkindik bolmady. Kóp ýaqyt ótti, biz odan ári júre aldyq. Sodan keıin bizde elektronıkamen problema týyndady, múmkin, ol apat saldarynan. Synǵan bólshekti tabý úshin kóp ýaqyt jumsadyq. Jarysta mundaı nárseler oryn alady. Biz márege jetkenimizge qýanyshtymyz, dedi Iаkýb Pshıgonskıdiń shtýrmany Tımo Gottshalk.
Jarystyń taǵy bir favorıti - nıderlandtyq Bernhard ten Brınke men Tom Konsýl komandasy úshin de kún sátsiz aıaqtaldy. Jolda ekıpaj Toyota Hilux kóliginiń júris bólshegin isten shyǵyp, qumdy turyp qaldy. Odan olar jaǵdaıdy túzep, alǵa jyljydy, alaıda avtokólikte jyldamdyq aýystyrý qoraby jumys istemeı qaldy. Jarysýshylar mehanızmdi jóndegennen keıin, benzın men maıdyń ıisin sezingeni aıtady. Jalpy alǵanda 1 saǵat 50 mınýtty joǵaltyp, ekıpaj odan ári kólikpen táýekelge barmady jáne jarysty odan jalǵastyrmaýdy sheshti.
«Toyota Hilux» avtokóliginde óner kórsetetin "Dakar 2019" rallı-marafonynyń jeńimpazy Nasser Ál-Attııa «Rallı Qazaqstan 2019» kezeńiniń favorıti mártebesin saqtap qaldy, jáne búgin tórtinshi bolyp máre syzyǵyn kesti.
- Qıyn kún. 50 kılometrden keıin bizdiń avtokólik ári júrmeı toqtap qaldy. Biz sebebin bilmedik. 45 mınýt turdyq, sodan keıin mashına otaldy. Biz odan ári kúrese bildik, arnaıy ýchaskeniń qalǵan bóligin jaqsy óttik. Kóp ýaqyt joǵaltqanymyz ras, biraq biz kesteniń basynda turmyz, erteń biz barymyzdy salamyz, dedi márege jetkende Nasser Ál-Attııa.
T2 jol talǵamaıtyn kólikter sanatynda qazaqstandyq ekıpaj Kırıll Chernenkov men Alekseı Mýnnyń ekıpajy jarystyń besinshi kúnin 4 saǵat 57 mınýt jáne 49 sekýnd nátıjesimen jeńip aldy. Osyǵan qaramastan, atalmysh kategorııadaǵy týrnır kestesin Katar shabandozy Mohamed El-Meer komandasy bastap tur.
T3 sanatyndy búgin eń jyldam ýaqytty Brazılııadan kelgen avtojarysshy Reınaldo Varela kórsetti, ol 4 saǵat 19 mınýt jáne 22 sekýnd nátıjesimen márege jetti.
Júk serııasynda reseılik "Kamaz-master" komandasynan Dmıtrıı Sotnıkovqa básekeles bolmady, onyń ekıpajy besinshi kúnniń qashyqtyǵyn 3 saǵat 32 mınýt jáne 9 sekýndta júrip ótti.
1 maýsym, qorytyndy kúni avtoshabandozdar Aqtaý qalasynan soltústikke qaraı ótetin eń qysqa 149 shaqyrymdyq arnaıy ýchaskelerdi júrip ótedi jáne Kaspıı teńiziniń jaǵasy boıymen qazaqstandyq kezeńdi aıaqtaıdy.
