Apennın túbeginde ótken jarysta Ispanııanyń Movistar klýbynyń serkesi Rıchard Karapastyń baq juldyzy jandy. Jalpy eseptiń jeńimpazy atanǵan onyń esimi Grand-týrda top jarǵan Ekvador eliniń tuńǵysh veloshabandozy retinde tarıhta qaldy. Ońtústik Amerıkanyń oǵlanynan nebary bir mınýt jáne bes sekýnd qana qalyp qoıǵan Bahreınniń Bahrain Merida komandasynyń sańlaǵy, ıtalııalyq Vınchenso Nıbalı ekinshi oryn ıelense, Gollandııanyń Jumbo-Visma klýbynyń múshesi slovenııalyq Prımoj Roglıch úshinshi satyǵa taban tiredi. Ol jeńimpazdan eki jarym mınýt artta qaldy.
«Astananyń» arlandary arasynda eń úzdik kórsetkishke Mıgel Anhel Lopes qol jetkizdi. Kolýmbııalyq sportshy jetinshi orynǵa jaıǵasty. Sonymen qatar, 25 jastaǵy saıypqyran «Djıro d'Italııa» dodasynyń eń úzdik jas veloshabandozyna tıesili «aq jeıdeni» ıelendi. Jalpy qazaqstandyq komandanyń sapynda óner kórsetken órender osy jarystyń kezeńdik saıystarynda úsh ret jeńiske jetkenin de aıtqan jón. Atap aıtsaq, 7 men 20 kezeńderde Pelo Bılbao aldyna jan salmasa, 15 kezeńde Darıo Kataldoǵa teń keler eshkim tabylmady.
