«Dostyq» úıi ortaq baılyqqa qyzmet etýi tıis
Sársenbi, 1 mamyr 2013 2:05
Qazaqstan halqynyń HH sessııasynda Elbasy Nursultan Nazarbaev «Dostyq» úıleriniń mańyzyna jáne olardyń aldaǵy ýaqytta qalaı jumys isteýi kerektigine toqtaldy. Rasynda, ulttar arasyndaǵy tatýlyq pen birlikti nyǵaıta berý úshin bul naǵyz kerek másele dep bilemin. Prezıdent aıtqandaı, ulttar men ulystardyń tatýlyǵy men dostyǵy úshin qandaı baǵa da, qandaı jumys ta kóptik etpeıdi.
Sársenbi, 1 mamyr 2013 2:05
Qazaqstan halqynyń HH sessııasynda Elbasy Nursultan Nazarbaev «Dostyq» úıleriniń mańyzyna jáne olardyń aldaǵy ýaqytta qalaı jumys isteýi kerektigine toqtaldy. Rasynda, ulttar arasyndaǵy tatýlyq pen birlikti nyǵaıta berý úshin bul naǵyz kerek másele dep bilemin. Prezıdent aıtqandaı, ulttar men ulystardyń tatýlyǵy men dostyǵy úshin qandaı baǵa da, qandaı jumys ta kóptik etpeıdi.
Qazir aqparattar aǵyny zamanynda ulttar men ulystardyń arasyndaǵy kıkiljiń oqıǵalardy jáne Jer sharynyń «ystyq núktelerindegi» jaǵdaılardy kún saıyn kórip-bilip otyrmyz. «Aǵaıyn tatý bolsa – as kóp» degen qazaqtyń maqaly bar. Tatýlyq bolsa birlik bolady, birlik bolsa iske bereke kiredi. Bereke bar jerde barlyǵy da bar. Bizdiń elimizde bir-birine alakózdenip otyrǵan eshkim joq. Bir ulttan turatyn eńbek ujymy joq. Qaı aýyldy, qaı eńbek ujymyn alsańyz da, onda túrli ult ókilderi kezdesedi. Olardyń barlyǵynyń da muńy men qýanyshy bir. Jumysty birge atqarsa, mereke qyzyǵyn birge kóredi, toı-tomalaqta da birge bolady.
Qostanaıdaǵy «Dostyq» úıin 2006 jyly Nursultan Ábishulynyń ózi kelip ashqan bolatyn. Onda qazir 16 etnomádenı birlestik bar. Osydan úsh jyl buryn qyrǵyz aǵaıyndardyń «Asaba» etnomádenı birlestigi tirkeldi. Bul – «Dostyq» úıindegi eń jas ujym. Olardyń ózderi de biraz qyzyqty sharalar ótkizip úlgerdi. Ýkraındardyń etnomádenı birlestigine bıyl on bes jyl toldy. Olar jyl saıyn festıval ótkizedi. Tatar-bashqurttyń sabantoıy da jylda atalyp ótedi. Al byltyrdan beri ázerbaıjan etnomádenı birlestigi músheleriniń bastamasymen Kavkaz halyqtarynyń festıvali ótýde. Bul sharany jaqynda ǵana búkil qostanaılyqtar taǵy da tamashalady.
Qazir ulttardyń mundaı mádenı sharasyna ózge ulttar ókilderiniń barlyǵy da qatynasady. Mysaly, ýkraınnyń delebeńdi qozdyratyn kóńildi ánderi men bılerin oryndaýshylardyń arasynda tek ýkraın emes, orystar da, qazaqtar da, koreıler de júredi. Qazir qazaqtyń ánin orys ta, koreı de, ózbek te, cheshen de naqyshyna keltirip oryndaı beredi. Basqa ulttar jóninde de osyny aıtýǵa bolady.
Qalanyń ortalyǵyndaǵy tarıhı ǵımaratqa ornalasqan «Dostyq» úıi bul kúnde úlken esik bolǵan. Onda kún saıyn mádenı sharalar ótip jatady. «Dostyq» úıi oblys ortalyǵynda ǵana bar. Al aýdandar men shalǵaı aýyldarda da osyndaı jumystar qajet. Prezıdent sessııada Assambleıa janynan «Dostyq» úıleri dırektorlarynyń respýblıkalyq ádistemelik keńesin quryp, jumystyń eń ozyq jáne tıimdi tásilderin tabýdy jáne ortalyqtandyrýdy tapsyrdy. Bul aldaǵy ýaqytta «Dostyq» úıleriniń jumysyna úlken kómek bolar edi. Oǵan jastardy kóbirek tartý kerektigi de baıqalady.
Qazir etnomádenı birlestikter sharalarynda, kóbinese, orta jáne aǵa býyn ókilderi júredi. Qazaqstanda turyp jatqan barlyq ulttar ókilderiniń dástúr-salty, mádenıeti – barlyǵymyzdyń ortaq baılyǵymyz. «Dostyq» úıleri osyǵan qyzmet etýi qajet.
Anton TRÝHANOV,
Qostanaı oblystyq
«Dostyq» úıiniń dırektory.
QOSTANAI.
