Jańarý bastamasy jáne ónerkásip múddesi

Kezdesýde taý-ken metallýrgııa kesheni ókilderi Ata zańdy jańartýǵa baǵyttalǵan bastamalardy qoldaıtynyn bildirip, reformalardyń salanyń ornyqty damýy úshin strategııalyq mańy­zyn atap ótti. Otyrysty palata prezıdıýmynyń tóraǵasy Qanat Sharlapaev ashyp, komıtettiń el ekonomıkasynyń naqty sektoryn tanystyratyn asa mańyzdy salany biriktiretinin aıtty. Onyń aıtýynsha, taý-ken metallýrgııa kesheninde búginde 200 myńnan astam adam eńbek etedi. Bul – turaqtylyqty, boljamdy saıasatty jáne erteńgi kúnge degen senimdi eń joǵary qundylyq sanaıtyn eńbek adamdary. «Salany damytý ornyqty saıasatty, tereń paıymdy jáne memleketpen turaqty dıalogti talap etedi. Sondyqtan elde júrgizilip jatqan ózgerister biz úshin erekshe mańyzdy», dedi Q.Sharlapaev.

Komıtet tóraǵasy Nıkolaı Radostoves óz sózinde elimizde júrip jatqan reformalardyń júıeli sıpatyna toqtaldy. Onyń aıtýynsha, bul ózgerister – formaldy jańarý nemese «ózgeris úshin ózgeris» emes, memleketti ınstıtýsıonaldyq turǵydan kúsheıtýge baǵyttalǵan naqty qadamdar. Ol jańa Konstı­týsııa jobasynyń ózeginde adamǵa baǵdarlanǵan qaǵıdat jatqanyn atap ótti. Azamattyń quqyqtary men múmkindikteri, bastamashyldyǵy memlekettik saıasattyń basty basymdyǵy retinde aıqyndalyp otyr. «Bul – ashyq, zamanaýı jáne damýǵa beıim memleket qalyptastyrýǵa umtylystyń kórinisi. Saıası júıe jańaryp keledi. Ol damyǵan elderde burynnan jumys istep kele jatqan ınstıtýsıonal­dyq qaǵıdattarǵa súıenedi. En­digi jerde qoǵamdyq-saıası ómir jekelegen tulǵalardyń ambısııasy tóńireginde emes, qoǵam qoldaıtyn baǵdarlamalar ne­gizinde qurylýǵa tıis», dedi komıtet tóraǵasy.

Al Baǵaly metaldar óndirý­shileri respýblıkalyq qaýym­das­tyǵynyń atqarýshy dırektory Qanat Baıtov konstıtýsııalyq reformanyń ınvestısııalyq ahýal úshin mańyzyn erekshe atap ótti. Onyń pikirinshe, Ata zańdaǵy ózgerister bıznes pen ınvestorlar úshin erejelerdiń turaqtylyǵy men túsiniktiligin qamtamasyz etýge baǵyttalǵan.

«Taý-ken metallýrgııa keshe­ni – uzaq ınvestısııalyq je­lisi bar, kapıtaly kóp salalarǵa jatady. Sondyqtan menshik quqy­ǵynyń qorǵalýy, zań ústem­digi men kásipkerlikke berile­tin kepildikterdiń kúsheıýi biz úshin sheshýshi faktor», dedi Q.Baıtov.

Ol sondaı-aq sot júıe­siniń táýelsizdigi men quqyq­tyq táýe­kelderdiń azaıýy iri ınves­tısııa­lyq jobalardy iske asyrýǵa tikeleı áser etetinin aıtty. Bul óz kezeginde jańa jumys oryndaryn qurýǵa, óńirlerdiń da­mýyna, qosylǵan qundy arttyrýǵa múmkindik beredi.

Talqylaý barysynda qaty­sý­shylar konstıtýsııalyq re­for­malardyń ornyqty damý, ekolo­gııalyq jaýapkershilik jáne keler urpaq aldyndaǵy mindetter­men tyǵyz baılanys­ty ekenin atap ótti. Negizgi zańdaǵy jańashyldyq­tar salany tehnologııalyq turǵy­­dan jańǵyrtýǵa jáne tıimdi she­shim­der engizýge jol ashady. Kez­desý qorytyndysynda taý-ken metal­lýrgııa kesheniniń ókilderi kons­tıtýsııalyq reformany qol­daıtyndaryn bildirip, salalyq qaýymdastyqtardy qoǵamdyq talqylaýǵa belsendi qatysýǵa shaqyrdy. Negizgi zańdy jańar­tý búkil qoǵamnyń, kásibı orta­nyń jáne óńirlerdiń ortaq isine aınalýǵa tıis degen ortaq pikir aıtyldy.