Erkin kúres sheberleriniń saıysynda jalǵyz Kamıl Krýglıev (97 kg) óner kórsetti. Bastapqy básekede Kamıl majarstandyq Rıchard Vehke ese jiberdi. Sóıtip, jerlesimiz jarysty erte aıaqtady.
Áıelder kúresinen ótken básekede qurlyqtyq deńgeıdegi dodalarda júlde alyp júrgen Zeınep Baıanova (50 kg), Irına Kýznesova (62 kg), Gúlmaral Erkebaeva (76 kg), qyzdar arasyndaǵy álem birinshiliginiń jeńimpazy Nılýfar Raımova (57 kg) beldesti. Alǵashqy aınalymda Zeınep reseılik Elızaveta Smırnovaǵa qaırat kórsete almady. Irına men Gúlmaral japonııalyq Nonoka Ozakı men Iаsýha Matsýkıden utyldy. Nýlfar úndistandyq Manısha Manıshaǵa ese jiberdi.
Grek-rım kúresinen 27 balýanymyz bozkilemge shyqty. Solardyń arasynan beseýi jeńis tuǵyryna kóterildi. 50 kg salmaqtaǵy Amanǵalı Bekbolatov pen Erbol Qamalıev úshinshi oryn úshin saıysta álem chempıonatynyń qola júldegeri, Azııanyń eki dúrkin chempıony, japonııalyq Iýı Shıotanı men jastar arasyndaǵy kadetter men jastar arasyndaǵy álem birinshiliginiń fınalısi, ırandyq Sajad Javıd Abbaspýraganıden aılasyn asyrdy. 72 kg salmaq dárejesinde synǵa túsken Almatbek Amanbek sheshýshi tusta qurlyq chempıony, ózbekstandyq Abror Atabaevty jolynan yǵystyrdy. 82 kg salmaqtaǵy Ibragım Magomadov amerıkalyq Djessı Porterdi utty. Asa aýyr salmaqtaǵy Oljas Syrlybaı grýzııalyq Ratı Talıkıshvılıden basym tústi.
Joǵaryda esimderi atalǵan jerlesterimizdiń barlyǵy da qola medal ıelense, 97 kg salmaqtaǵy Islam Evloevke kúmis júlde buıyrdy. Jartylaı fınalda álem, Eýropa chempıonattarynda eki ret júlde alǵan Serbııanyń ataqty balýany Mıhaıl Kadjaıany qapy qaldyrǵan otandasymyz fınalda álem chempıonatynyń fınalısi, 23 jasqa deıingiler arasyndaǵy álem chempıony, majarstandyq Aleks Shokeden jeńildi.
Bir ókinishtisi, osy jarysqa qatysqan Parıj Olımpıadasynyń kúmis júldegeri Demeý Jadyraev (82 kg), álem chempıony Aıdos Sultanǵalı (63 kg), álem chempıonatynyń júldegerleri Erjet Jarylqasyn (67 kg) syndy beldi balýandarymyz júldeli oryndardan tys qaldy. Sańlaqtarymyzǵa jańa salmaq jaqpady. Alǵashqy aınalymda Erjet túrkııalyq Murat Fırattyń, shırek fınalda Aıdos moldovalyq Vıtalıı Eremenkonyń, Demeý ırandyq Muhammed Reza Mohtarıdiń osal tusyn taba almady.
