Foto: Ashyq derekkóz
Resmı dılerden satyp alynǵan kólikti tirkeý
Elimizde óndirilgen avtokólikterdi bastapqy tirkeý endi qashyqtan júrgiziledi. Qyzmet respýblıka boıynsha 100-den astam iri dılerlik ortalyqta qoljetimdi. Olardyń qatarynda «Aster Auto» JShS, «Terra Motors Astana» JShS, «Allur Motor Qazaqstan» JShS, «Hyundai Auto Almaty» JShS, «Mycar Astana» JShS jáne basqa da avtosalondar bar. Integrasııalyq júıege qosylǵan dılerler sany kezeń-kezeńimen artyp keledi.
Úderis qarapaıym – satyp alýshy avtosalonda kólikti tańdap, satyp alý-satý shartyn jasaıdy. Odan keıingi tirkeý rásimi onlaın ótedi, avtosalonǵa qaıta barýdyń qajeti joq.
Dıler ótinim jibergen soń, satyp alýshynyń eGov.kz portalyndaǵy jeke kabınetine nemese eGov Mobile qosymshasyna habarlama túsedi. Paıdalanýshy derekterdi tekserip, memlekettik tirkeý nómirlik belgisin tańdaıdy jáne ótinimdi qoljetimdi tásilderdiń birimen rastaıdy.
Endi kólik nómirine mobıldi qosymsha arqyly tapsyrys berýge bolady
Qyzmet kórsetý merzimi – 2 saǵatqa deıin. Daıyn qujattar men memlekettik nómirler tańdalǵan mamandandyrylǵan HQKO-dan beriledi.
2026 jyldyń basynan bastap memlekettik tirkeý nómirin onlaın tańdaý qyzmeti iske qosylyp, avtokólik ıeleri arasynda joǵary suranysqa ıe boldy.
Endi menshik ıesi ózgermegen jaǵdaıda tehnıkalyq pasport pen memlekettik nómirdi aýystyrý da onlaın júzege asady. Júıe ótinim berilgen sátte kólik quralynyń aıyppuldary men ózge de shekteýlerin avtomatty túrde tekseredi. Qyzmet kórsetý ýaqyty – 1 saǵat.
Eger kólik kepilde tursa nemese ózge de shekteýler anyqtalsa, rásimdeý mamandandyrylǵan HQKO-ǵa júginý arqyly júrgiziledi.
Azamattar arasyndaǵy satyp alý-satý
eGov.kz jáne eGov Mobile platformalarynda jeke tulǵalar arasynda avtokólikti satyp alý-satý shartyn elektrondyq formatta rásimdeý múmkindigi engizildi.
Buǵan deıin bul qyzmet jekelegen bankterdiń servısteri arqyly ǵana qoljetimdi edi. Endi servıs memlekettik deńgeıde biriktirilip, mámileni resimdeýdiń biryńǵaı sıfrlyq tetigi qalyptasty.
Jasandy ıntellekt jáne sıfrlyq damý birinshi vıse-mınıstri Rostıslav Konıashkınniń aıtýynsha buǵan deıin Ishki ister mınıstrliginiń qoldaýymen iri bankterdiń mobıldi qosymshalarynda avtokólikti onlaın rásimdeý qyzmeti iske qosylǵan bolatyn. Endi sıfrlyq servıster tirkeý úderisiniń tolyq sıklin qamtıdy – avtosalonnan jańa kólik satyp alýdan bastap, azamattar arasyndaǵy mámilelerge deıin. Bul sáýir aıynan bastap mamandandyrylǵan HQKO-larǵa barý sanyn edáýir qysqartýǵa múmkindik beredi.
Onlaın servısterdi damytý rásimderdi jeńildetýge, oflaın ótinishter sanyn azaıtýǵa jáne tirkeý áreketteriniń ashyqtyǵyn arttyrýǵa baǵyttalǵan.
Jańartý Ishki ister mınıstrligi, Jasandy ıntellekt jáne sıfrlyq damý mınıstrligi Memlekettik qyzmetter komıteti jáne «Ulttyq aqparattyq tehnologııalar» AQ-nyń birlesken jumysy aıasynda júzege asty.
