Foto: freepik.com
Serik Jumanǵarın tutynýshylar tek áleýmettik mańyzy bar ónimderdi ǵana emes, ózge de taýarlardy satyp alatynyn atap ótti. Olardyń bir bóligi shetelden ákelinedi. Bul ishki naryqtaǵy baǵaǵa tikeleı yqpal etedi.
Sonymen qatar álemdik naryqta azyq-túlik quny ósip otyr. Mınıstrdiń sózinshe, sońǵy ýaqytta sút pen et aıtarlyqtaı qymbattaǵan. Sonyń saldarynan otandyq ónimder eksporttyq naryqta suranysqa ıe bola túsken.
«Fermerler ónimin eksportqa shyǵarýǵa múddeli, sebebi syrtta baǵa joǵary. Ishki naryqta satýdy suraǵanda, olar tabystylyǵyn saqtaǵysy keletinin aıtyp, baǵany kóteredi», dedi mınıstr.
Ol memlekettiń agrarlyq ónimdi shetelge satýǵa tyıym sala almaıtynyn, sebebi bul salanyń bıznes úshin tartymdylyǵyn tómendetip, aýyl sharýashylyǵynyń damýyna keri áserin tıgizýi múmkin ekenin aıtty
Mınıstr taǵy bir mańyzdy faktor retinde «ımporttalǵan ınflıasııany» atady. Qańtar qorytyndysy boıynsha Qazaqstanda azyq-túlik ınflıasııasy 0,8% bolsa, Reseıde bul kórsetkish shamamen 2% bolǵan. Al elimizge jetkiziletin taýarlardyń eleýli bóligi Reseıden keledi.
Jumanǵarınniń pikirinshe, baǵanyń ósýin tek QQS-tyń 4%-ǵa artýymen túsindirý jetkiliksiz. Azyq-túlik qunyna áser etetin sebepter kesheni bar.
Azyq-túlik baǵasyn negizsiz ósirgen kásipkerler jaýapqa tartyldy
Mınıstr máseleniń túıinin otandyq óndiristi kúsheıtý jáne ishki naryqty óz ónimimizben tolyq qamtý dep sanaıdy. Qazir memleket osy baǵytta júıeli jumys júrgizip jatyr.
Aıta keteıik, jyl basynan beri birinshi surypty unnan pisirilgen nan baǵasy da aıtarlyqtaı ósti. Qańtardyń alǵashqy onkúndiginde el boıynsha ortasha baǵa 1,8%-ǵa kóterildi. Bul 2022 jyldyń naýryzynan bergi eń joǵary ósim.
