Alataý aýdanyndaǵy kólik jáne ınjenerlik ınfraqurylymnyń, sonymen qatar áleýmettik jáne turǵyn úı obektileriniń qurylys qarqynyn teksergen Almaty ákimi Baýyrjan Baıbek aýdanyndaǵy 440-tan astam kóshege jańa joldar salý úshin jergilikti bıýdjetten qosymsha 4 mlrd teńge bólýdi tapsyrdy.
Eger 3 jyl ishinde munda 15 km jol tóselse, endi jóndeý jumystary aıaqtalǵan soń 13 yqsham aýdan turǵyndary 118 km jańa jolǵa ıe bolady. Aýdanda ortasha jáne aǵymdaǵy jóndeý jumystary qatar júrýde. Uzyndyǵy 3,2 km bolatyn Saıyn kóshesin Rysqulovtan Aqyn Saraǵa deıin úńgileýge qarjy bólindi.
Áleýmettik jelilerdegi ótinishterdi qarap shyqqan Almaty ákimi Saıaly-2 yqsham aýdanyndaǵy «Nurly jer» baǵdarlamasy boıynsha salynǵan úılerdi baryp kórdi. Baýyrjan Baıbek qurylysshylardyń nazaryn aýla aýmaǵyn abattandyrýdaǵy olqylyqtarǵa aýdaryp, úıdi paıdalanýǵa berýdi jedeldetýdi tapsyrdy.
Qalanyń Baspsóz qyzmetiniń málimetteri boıynsha, «Elbasy bastamasynyń arqasynda Alataý aýdanynda «Nurly jer» baǵdarlamasy boıynsha qurylys keń qanat jaıýda. О́tken jyly eki myń otbasy jeke páterlerine ıe boldy. Bıylǵy jyly da birneshe turǵyn úıdi iske qosý josparlanǵan. Turǵyndar sanynyń artýyna oraı kólikke qatysty másele týyndaýy múmkin, ony aldyn-ala sheshý qajet. Sondyqtan qalalyq Mobıldilik basqarmasy ákimmen birge Alataý aýdanyn qoǵamdyq kóliktiń jańa baǵyttarymen qamtamasyz etýi tıis», - dep atap ótti Baýyrjan Baıbek.
Aıta keterligi, Alataý aýdanynda Indýstrıaldy aımaqqa jaqyn jerde gazben júretin 200 avtobýsqa arnalǵan jańa avtobýs parkiniń qurylysy aıaqtalyp qaldy. «Batý travel» kompanııasy 130 avtobýstyq jeke avtopark salýda. Osylaısha, qalanyń qoǵamdyq kóligine qyzmet kórsetetin jáne ustap turatyn kásiporyndar klasteri qalyptasýda.
Alataý aýdanyna jasaǵan jumys sapary barysynda Baýyrjan Baıbek jeti myń oryndy jańa meshit qurylysynyń qarqynyn tekserdi. Jeke ınvestısııa esebinen salynatyn nysan jobasynda meshitte bıiktigi 49 metrge deıin jetetin birneshe munaralar bolady. Keshenniń orta tusyna bes kúmbezdi negizgi ǵımarat ornalasady.
Buryndary qurylys merzimi ýchaskeni sý basyp qalý qaýpinen saqtaý úshin júrgizilgen ınjenerlik qorǵaý jumystaryna baılanysty uzarǵan edi. Qazirgi kezde 3 myń svaı bekitildi jáne irgetasy betondaldy. Negizgi bloktyń armatýraly qabyrǵalaryn ornatý bastaldy.
Jalpy 10 jyl ishinde qalaǵa qosylǵan aýdanǵa 430 mlrd. astam teńge jumsaldy. 12 mektep, 5 emhana, 98 memlekettik jáne jeke bala baqshalar, birqatar sport jáne mádenıet obektileri iske qosyldy. «Ýnıversıada murasy» jobasy boıynsha kezekte turǵandardyń 1,7 myńy Atletter aýylynan jaıly páterler aldy.
Aýdannyń Indýstrıaldy aımaǵynda japondyq, koreılik, reseılik, qytaılyq, ıtalıandyq jáne ózge de sheteldik ınvestısııalar esebinen 39 joba júzege asýda. Bıylǵy jyly quny 37,6 mlrd. teńge bolatyn tórt jobany iske qosý josparlanǵan.
ALMATY
