Kenshiler astanasyndaǵy oblystyq tarıhı-ólketaný murajaıynda ótken «Murajaıdaǵy oıynshyqtar álemi» atty kórmeniń ashylý barysynda sharany uıymdastyrýshylar osyndaı pikirlerdi alǵa tartty.
Murajaıdyń ǵylymı qyzmetkeri Dınara Saqymbaı oıynshyqtardy tańdaýdyń zor jaýapkershilikti talap etetin aıtady. Onymen balany qyzyqtyryp, aldarqatyp qana qoıý azdyq etedi eken. Mysaly, oıynshyqtar balalardyń álem týraly túsinigin burmalamaı, kerisinshe ony damytyp, jan dúnıesin baıytýy tıis.
– Eń kóne oıynshyqtardyń biri – ol qýyrshaq. Kórmege sovet dáýirindegi jáne 90-shy jyldardyń basyndaǵy oıynshyqtar qoıyldy, – deıdi ǵylymı qyzmetker.
Kórmede murajaı qyzmetkerleri ár jyldary jınaǵan 115 oıynshyq kelýshiler nazaryna usynyldy. Olardyń ishindegi eń kónesi – emen aǵashynyń jońqasymen toltyrylǵan 1964 jylǵy púlish aıý bolyp shyqty.
Oıynshyqtardyń basym bóligin belgili bir oqıǵalarǵa oraı jasalǵandary quraıdy. Mysaly, 1980 jyly Máskeýde ótken Olımpıada dodasy jáne basqa da aıtýly datalar taqyrybyna arnalǵan oıynshyqtar kózge birden túsip, nazardy eriksiz aýdarady.
Sonymen qatar, kórmede ótken ǵasyrdyń 80-shi jyldary oblystaǵy Osakarovka jıhaz fabrıkasynda aǵashtan jasalǵan oıynshyqtar – «Chaıka» tigin mashınalarynyń modelderi, júk kólikteri, búldirshinderdiń jıhazdary kelýshilerge kádimgideı oı salyp, keshegi tarıhqa balanyń kózimen úńilýge jeteleıdi. Qııaldyń qanatyna mindirip, balalyq baldáýren shaqtyń sıqyrly álemine saıahattap qaıtýǵa shaqyrady.
Qaraǵandy oblysy
