Eki kún boıy sharaǵa qatysýshylar kónergen ken oryndardy ıgerýde kún tártibinde turǵan máselelerdi talqylap, óńdeý jumystarynyń tıimdiligin arttyrý maqsatynda zamanaýı tehnologııalardy damytý, engizý jáne ken oryndardy sıfrlyq júıege kóshirýdegi tájirıbelerimen bólisti. Konferensııa jumysyna ǵylymı ınstıtýttar, ýnıversıtetter, Qazaqstan, Reseı, Qytaı, Ázirbaıjan elderiniń munaı-gaz salasynyń mamandary, sonymen qatar QR Energetıka mınıstrliginiń qyzmetkerleri, Mańǵystaý oblysy ákimdigi men «QazMunaıGaz» kompanııalar tobynyń ókilderi qatysty.
Uıymdastyrylǵan konferensııa jumysynyń aıasynda «QazmunaıgazǴZJI»-nyń jańa ákimshilik ǵımaraty jáne zerthanalyq korpýs ashyldy. Saltanatty sharaǵa «KAZENERGY» qaýymdastyǵy tóraǵasynyń orynbasary Uzaqbaı Qarabalın, Energetıka mınıstriniń birinshi orynbasary Mahambet Dosmuhambetov, Mańǵystaý oblysy ákiminiń birinshi orynbasary Álıhan Qyraýbaev jáne «QazMunaıGaz» UK» AQ Basqarma tóraǵasynyń óndiris jónindegi orynbasary Jaqyp Marabaev qatysty.
- «QazmunaıgazǴZJI» tarıhy Mańǵystaýdaǵy kóptegen munaı jáne gaz ken oryndarynyń ónerkásiptik óńdelýi, ıgerilýi jáne iske qosylýymen tyǵyz baılanysty. Kóptegen ken oryndaryn ashý úshin ǵylymı-zertteý men jobalaý-izdeý jumystaryn júrgizý kerek boldy. «QazmunaıgazǴZJI» ujymy sol mańyzdy jumysty qazir de jalǵastyryp kele jatqany qýantady. Meniń oıymsha, osyndaı barlyq múmkindik qarastyrylǵan keńsede ınstıtýt ujymy budan da úlken jetkistikterge qol jetkizetinine senimdimin, dedi U.Qarabalın.
О́z kezeginde Jaqyp Marabaev ınstıtýttyń 50 jyldyǵy qazaqstandyq munaı tarıhymen tyǵyz baılanysty ekenin atap ótti. Mańǵyshlaq munaı ken oryndarynyń ashylýynan búgingi kúnge deıin zertteý jumystary jalǵasyp keledi. Instıtýttyń ǵalymdary osy ýaqytqa deıin qazaqstandyq munaı qoryn durys ıgerýde aıtarlyqtaı úles qosyp keledi.
Jańadan boı kótergen ákimshilik ǵımarat pen zerthanalyq korpýs eki gektar jerdi alyp jatyr. Zamanaýı qondyrǵylarmen jabdyqtalǵan ǵylymı-zerthanalyq ortalyq eki bloktan turady: munaı úlgisiniń qoımasy jáne zerthana. Al aýdany 11 myń sharshy metr bolatyn segiz qabatty ǵımaratta qyzmetkerlerdiń nátıjeli jumys isteýi úshin barlyq jaǵdaı jasalǵan.
Mańǵystaý oblysy
