Jıyn Ortalyq saılaý komıssııasynyń 9 maýsymda ótken kezekten tys prezıdenttik saılaýdyń aldyn ala qorytyndysyn jarııalaǵannan keıin uıymdastyryldy. Basqosýǵa Qazaqstan Kommýnıstik halyq partııasy respýblıkalyq saılaýaldy shtabynyń jetekshisi Aıqyn Qońyrov jáne onyń orynbasary Vıktor Smırnov qatysty.
Atalǵan partııa atynan prezıdenttikke kandıdat retinde usynylǵan Jambyl Ahmetbekov OSK habarlaǵan saılaýdyń nátıjesimen kelisetinderin, barlyq kórsetkish halyqtyń shynaıy qoldaýymen sáıkesetinin málimdedi.
«Saılaý ashyq ári ádil ótti. Saılaýaldy naýqan barysyndaǵy kúres shynaıy ári básekeli boldy. Bizdiń úgit-nasıhat jumysyn júrgizýshiler zańnama aıasynda respýblıkalyq shtabtyń josparyna saı bekitilgen barlyq qajetti sharany qabyldady. Konstıtýsııa kepil bolǵan teńdik pen básekelestik zańy tolyq saqtaldy. Bizdiń baıqaýshylardyń saılaýdyń nátıjesine yqpal etetin óreskel quqyq buzýshylyqty anyqtamaǵanyn málimdegim keledi», dedi ol.
Osylaı deı kele, Jambyl Ahmetbekov Nur Otan partııasy atynan saılaýǵa qatysqan Qasym-Jomart Toqaevqa quttyqtaýyn joldap, onyń jeńisi senimdi ári laıyqty bolǵanyn atap ótti. Sondaı-aq ózine qoldaý kórsetken barlyq qazaqstandyqqa alǵysyn aıtyp, kezekten tys prezıdent saılaýy joǵary bılik tranzıtiniń sheshýshi kezeńi bolatynyna jáne Qazaqstandy jańǵyrtý jolyndaǵy reformalardyń júzege asýyna yqpal etetinine senim bildirdi.
Sóziniń sońynda Jambyl Ahmetbekov partııa jaqtastary men belsendilerine saılaýaldy naýqandy tıisti dárejede uıymdastyryp, atqaryp shyqqany úshin rızashylyǵyn jetkizdi. «Men bul saılaýdyń qorytyndysyn bizdiń jeńilisimiz dep eseptemeımin. Biz kúshimizdi kórsettik, taǵy bir márte ózimizdi tekserdik. Parlament Májilisiniń saılaýy aldynda oblystyq, aýdandyq komıtetterdiń shama-sharqyn baıqadyq», dep óz oıyn túıindedi.
